OQO-da daladan tabylǵan balanyń qulaǵynyń tusynda sırek kezdesetin belgi bar - dárigerler
ASTANA. QazAqparat - Ońtústikte taǵy da bir tastandy bala tabylǵanyn habarlaǵanbyz . Saıram aýdanyna qarasty Aqbulaq aýylynda tabylǵan shaqalaqty anasy týa salysymen sómkeniń ishine salyp, jalańash kúıinde kóshede tastap ketken.
Týǵan anasy qystyń sýyq kúninde dalaǵa tastap ketken shaqalaqtyń alǵashqyda jaǵdaıy aýyr bolatyn. Jedel járdemmen jetkizilgen balaqaıǵa dárigerler shuǵyl túrde qarqyndy terapııa jasap, ómirin saqtap qalǵan. Qazir tastandy bala ınkýbatorda em qabyldaýda, dep jazady Otyrar.kz.
Dúnıe esigin asha salysymen taǵdyry shytyrmanǵa aınalǵan sábıdi dárigerler «erekshe balaqaı» deıdi. Óıtkeni sol qulaǵynda belgi bar. Mundaı belgimen týatyn náresteler sırek kezdesedi. Sondyqtan, dárigerler qyz balaǵa Artýǵaı degen esim beripti. Osylaısha kósheden tabylǵan tastandy bala mundaǵy dárigerlerdiń kózaıymyna aınalǵan.
«Túsken kezde jaǵdaıy aýyr edi. Óıtkeni denesi qatty sýyqtap qalǵan, merzimine jetken belgilermen kelgen. Salmaǵy 3 keli 888 gr, boıy - 52 sm. Antıbıotıkter saldyq, dene qyzýy birtindep tústi. Qazirgi jaǵdaıy ortasha", - deıdi náresteler bólimshesiniń meńgerýshisi Nursulý Kenjebekova.
Aýyl turǵyndarynyń paıymdaýynsha, kókek ana balany ádeıi osy jerge tastap ketken. Óıtkeni bul kóshe úlken ári adamdar úzilmeıdi. Sol kúngi oqıǵa ornynda áli kúnge deıin qan izderi jatyr.
Tastandy balany alǵash kórgen jan - Gúlmıra Serikbaeva. Ol 4 naýryz kúni mektepke jumysqa bara jatqan kezde úıiniń mańyndaǵy aryqtan jylaǵan balanyń daýysyn estipti. Júgirip barsa, qytaılyq sómkeniń ishinde jańadan týǵan náreste jatyr eken. Kindigi kesilmegen balaqaıdyń denesiniń tońyp qalǵanyn baıqaǵan Gúlmıra oılanbastan alǵashqy kómek kórsetken.
"Balanyń kindigi kesilmegen, jaýrap qalǵan. Sosyn sómkeden shyǵaryp, denesin kúnge tosa qoıdym. Sodan jedel járdem keldi. Alǵashqy kómekti kórsetti. Balanyń kindigin kesti. Tońyp qalǵanyna qaraǵanda anasy bir-eki saǵat buryn bosanǵan sııaqty", - kitaphanashy Gúlmıra Serikbaeva.
Balany kezdeısoq taýyp alǵan ol tastandy qyzdy asyrap alǵysy keledi. Óıtkeni «taǵdyrdyń jazýymen shaqalaqtyń ary qaraı ómir súrýine sebepshi bolǵym keledi» deıdi. Biraq, bul balaqaıdyń ata-anasy kim bolary áli belgisiz. Degenmen, qazirdiń ózinde sábıdi asyrap alýǵa nıet etkender kóp. Al quzyrly organ ókilderi aıdyń-kúnniń amanynda týǵan balasyn dalaǵa tastap ketken kókek anany izdestirýde.
