OQO-da «Connection point» qyzmetin 1 mıllıonǵa jýyq azamat paıdalanǵan
ASTANA. Qazaqparat - Ońtústik Qazaqstan oblysynda jalpy 33 Halyqqa qyzmet kórsetý ortalyǵy qyzmet kórsetedi. Qorytyndylaı aıtqanda, 2017 jyldyń 10 aıynda 5 mıllıonǵa jýyq qyzmet kórsetilgen, dep habarlaıdy óńirlik ákimdiktiń baspasóz qyzmeti.
HQKO-nyń bólimderinde azamattar memlekettik qyzmetti ózdiginen alý úshin «Connection point» (ózine-ózi qyzmet etý sektory) júıesi jumys atqarýda. Aǵymdaǵy jyldyń 10 aıynda bul qyzmet túrin 1 mıllıonnan astam azamat paıdalanǵan. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq «Halyqqa qyzmet kórsetý ortalyǵy» departamentiniń dırektory Erkebulan Álseıitov málimdedi.
Sondaı-aq, múmkindigi shekteýli jandarǵa da memlekettik qyzmet túrlerin kórsetý jumystary jalǵasyn taýyp keledi. Máselen, 1 jáne 2-top múgedektigi bar adamdar memlekettik qyzmetterdi úılerinde alyp otyr.
«2017 jyly Ońtústik Qazaqstan oblysy boıynsha HQKO-nyń bólimderi azamattardyń úılerine bara otyryp 5 myńǵa jýyq qyzmet kórsetti. Sonymen qatar, «Azamattarǵa arnalǵan úkimet» memlekettik korporatsııasynda sóıleý jáne estý qabileti buzylǵan azamattarǵa memlekettik qyzmetterdi kórsetýde jańa servıs paıda boldy. Búginde óńirdegi HQKO-da sýrdoaýdarma tilin meńgergen 89 maman jumys isteýde», - dedi Erkebulan Asanbaıuly.
Onyń aıtýynsha, «Azamattarǵa arnalǵan úkimet» memlekettik korporatsııasy jyldyń basynan birneshe jańa pılottyq jobany iske qosqan. Onyń maqsaty - qyzmet alýshynyń ýaqytyn únemdeýge baǵyttalyp otyr. Máselen, pılottyq joba negizinde: jer ýchaskesiniń kadastrlyq qunyn anyqtaýǵa jáne jyljymaıtyn múlikke quqyqtardy memlekettik tirkeýge, sondaı-aq bala týýdy tirkeý men sottylyqtyń bolyp-bolmaýy týraly anyqtama alýǵa múmkindik týady.
Sonymen qatar, qazirgi tańda «Qazposhta» AQ oblystyq fılıaly HQKO-men birlesip, daıyn qujatty úıge jetkizý qyzmetin kórsete bastady. Endi front ofısteri joq eldi meken turǵyndary aýdan ortalyqtaryna barmaı jáne mobıldi HQKO qyzmetkerlerin kútpeı-aq, 70-ten astam memlekettik qyzmetti ala alady.
