OQO-da bolǵan atysta qańǵyǵan oq 82 jastaǵy ájeniń basyna tıdi
ASTANA. 23 mamyr. QazAqparat - OQO-da bolǵan atysta qańǵyǵan oq 82 jastaǵy ájege tıdi. Oq qart kisiniń basynan jáne ıyǵynan jaraqattady.
Bul týraly búgin ІІM ótken brıfıng barysynda vedomstvonyń resmı ókili Nurdildá Oraz málim etti.
«21 mamyrda Shymkent qalasynyń turǵyny Saryaǵash aýdanynyń Abaı aýylyndaǵy úılerdiń birine kelip, úıden jas jigitti áńgimelesý úshin shaqyrǵan. Áńgimelesý barysynda kúdikti anyqtalmaǵan qarýdan jas jigit turǵan jaqqa oq atady, alaıda oq onyń qasynda otyrǵan ájesine tıgen. 82 jastaǵy qart kisiniń basyna jáne ıyǵyna jaraqat keltirildi. Polıtsııa qyzmetkerleri kisi óltirýge oqtalý faktisi boıynsha qylmystyq is qozǵap, ony izdestirýge kiristi», - dep atap kórsetti resmı ókil.
Alaıda, bunymen oqıǵa aıaqtalǵan joq. Jábirlenýshiniń ekinshi nemeresi kináliden kek alý úshin qolyna qarý alyp, óziniń dostarymen birge, Shymkentten Abaı aýylyna qaraı barady. Aýylǵa kelgen boıda, olar polıtsııa qyzmetkerleriniń kózine túsken.
«Qýdalaýdan qutylý úshin olar Saryaǵash qalasyna baǵyt alady. Jol boıynda kólik nómirlerin aýystyrady da, jábirlenýshiniń nemeresi taksıge otyryp ketedi. Sol maqsatta polıtsııa qyzmetkerleri «Tosqaýyl» josparyn jarııalaǵan. Bul is-sharalardy ótkizý barysynda «Qyzyl tý» beketinde Qazyǵurt AІІb-niń jedel ýákilderi «Aýdı» avtomashınasyn toqtatqan. Polıtsııa qyzmetkerleri mashınany toqtatý kezinde qashyp ketpek bolǵan kólik jolaýshysyn qýyp jetti. Tintý barysynda odan nómirleri óshirilgen 2 «Makarov» tapanshasy, 1 «TT» tapanshasy, sondaı-aq betperde tabylyp, tárkilendi. Sol kúni polıtsııa qyzmetkerleri kúdiktiniń eki sybaılasyn ustady», - dedi N. Oraz.
Zattaı dáleldeme retinde alynǵan qarý sot-ballıstıkalyq saraptamaǵa jiberildi. Kúdikti azamattar ustaldy, tergeý amaldary júrgizilýde.
