OQO-da bıyl medıtsına salasy 100 paıyz aqparattyq júıege kóshedi

ShYMKENT. QazAqparat - Ońtústik Qazaqstan oblysynda qazirgi ýaqytta medıtsınalyq uıymdardyń aqparattyq júıemen qamtamasyz etilýi 63 paıyzdy quraıdy. Aǵymdaǵy jyldyń 1 shildesine deıin bul kórsetkish 100 paıyzǵa jetetin bolady. Búgin bul týraly OQO óńirlik kommýnıkatsııalar qyzmetinde ótken brıfıngte «Respýblıkalyq elektrondyq densaýlyq saqtaý ortalyǵy» OQOF dırektory Aqjarqyn Taýbaeva málim etti, dep habarlaıdy QazAqparat tilshisi.

Memleket basshysy bıylǵy Joldaýynda aqparattyq júıelerdi biriktirý, mobıldik tsıfrlyq qosymshalardy qoldaný, elektrondyq densaýlyq pasportyn engizý, «qaǵaz qoldanbaıtyn aýrýhanaǵa» kóshý arqyly medıtsınalyq kómektiń qoljetimdiligi men tıimdiligin arttyrý qajettigine basa nazar aýdarǵan bolatyn. Osyǵan oraı oblysta densaýlyq saqtaý salasynda jańa tehnologııalardyń zamanaýı naryǵyn usyný aıasynda «Damý» keshendi medıtsınalyq aqparattyq júıesi engizilýde. Brıfıngke qatysqan ortalyq dırektory Aqjarqyn Taýbaeva saladaǵy tsıfrlandyrý - eń aldymen azamattardyń óz densaýlyǵyna degen jaýapkershiligin arttyrý ári dárigerlerge turǵyndardyń densaýlyǵyn baqylap otyryp, túrli syrqattyń aldyn alýǵa septigin tıgizetindigin jetkizdi. 

«Tsıfrlandyrý baǵdarlamasy 2018-2022 jyldar kezeńinde iske asyrylady jáne eńbek ónimdiliginiń aýqymdy jáne uzaq merzimdi ósýine jaǵdaı jasaıdy. Baǵdarlama azamattardyń dárigerge jazylýy men dárigerdi úıge shaqyrýdan bastap búkil profılaktıkalyq, dıagnostıkalyq jáne emdik medıtsınalyq qyzmetterdi tolyq qamtıdy», - dedi Aqjarqyn Ábdibekqyzy.

Aǵymdaǵy jyldyń І-toqsanynyń sońyna qaraı ýaqytsha eńbekke jaramsyzdyq qaǵazyn, sondaı-aq týberkýlezge qarsy, psıhonevrologııalyq, narkologııalyq uıymdarǵa qatysty anyqtamalardy Elektrondy úkimet portaly arqyly berý josparlanýda.

«Naýqastar úshin ózderiniń jeke paraqshalary arqyly qabyldaýǵa jazylý, dárigerdi úıge shaqyrý, SOS batyrmasy ǵalamtor arqyly qol jetimdi bolyp otyr. Óńirde medıtsınalyq uıymdardyń 78 paıyzy kompıýterlik tehnıkamen jabdyqtalǵan. Aǵymdaǵy jyly densaýlyq saqtaý uıymdaryn kompıýterlik tehnıkamen tolyqtaı 100 paıyz qamtamasyz etý úshin 7500-den astam kompıýterlik tehnıkany satyp alý úshin bıýdjetten qarjy bólindi», - dedi Oblystyq densaýlyq saqtaý basqarmasynyń bólim basshysy Ermek Tájimurat.