OQO-da bıyl egistik kólemi 4,7 myń gektarǵa artty
ShYMKENT. QazAqparat - Ońtústik Qazaqstan oblysynda aýyl sharýashylyǵy daqyldarynyń egis kólemi jyldaǵymen salystyrǵanda 4 700 gektarǵa artyp, egis kólemi 780,5 myń gektarǵa jetti, dep habarlaıdy oblys ákimdiginiń baspasóz qyzmeti.
Dıhandar jazdyq astyq pen maqta alqabynyń kólemin kóbeıtýdi josparlap otyr. Atap aıtqanda, byltyr Kúngeı maqtashylary 99,3 myń gektarǵa «aq altyn» ekse, bıyl onyń kólemin 11,3 myń gektarǵa kóbeıtip, aq maqta alqabyn 110,6 myń gektarǵa jetkizýdi josparlap otyr.
Sonymen qatar, bıyl jazdyq astyqtyń kólemi ulǵaıǵan. Máselen, 41,2 myń gektarǵa jazdyq astyq egý mejelense, búginge deıin jospar 108 paıyzǵa artyǵymen oryndalyp, 44,3 myń gektarǵa (7,2 myń ga bıdaı, 33,9 myń ga arpa) dán sebilgen.
Sondaı-aq, óńir dıqandary 33 myń gektarǵa (meje - 46 myń ga) jońyshqa, 45,6 myń gektarǵa (meje - 72,4 myń ga) maqsary, 6,5 myń gektarǵa (meje - 13,8 myń ga) kartop, 16 myń gektarǵa (meje - 35,7 myń ga) kókónis egip úlgerdi. Egý jumystary budan ári jalǵasady.
Aıta ketken jón, bıylǵy jer aıdaý jumystary 460,6 myń gektarǵa mejelenip, 5 sáýirdegi málimet boıynsha naqty 450,2 myń gektar jer jyrtylyp, jumystar 98 paıyzǵa oryndaldy.
