OQO-da bıyl bir myń gektar sýarmaly jer aınalymǵa qosylady
ShYMKENT. QazAqparat - OQO-da bıyl 1 000 gektar sýarmaly jer aınalymǵa qosylady. Bul týraly búgin óńirdegi sýarmaly jerlerdi ulǵaıtý máseleleri boıynsha májiliste sóz boldy. Oblys ákiminiń tóraǵalyǵymen ótken jıynǵa aýdan, qala ákimderimen sý sharýashylyǵy mekemeleriniń basshylary, «Qazsýshar» jáne «Ońtústik Qazaqstan gıdrogeologııalyq-melıoratıvtik ekspedıtsııasy» respýblıkalyq memlekettik kásiporyndarynyń ókilderi qatysty, dep habarlaıdy QazAqparat HAA tilshisi.
Májilis barysynda «Qazsýshar» jáne «Ońtústik Qazaqstan gıdrogeologııalyq-melıoratıvtik ekspedıtsııasy» RMK ókilderiniń atqarǵan jumystarynyń esepteri men usynystary tyńdaldy.
Ústimizdegi jyly 37 shaqyrymdyq 12 sý nysandaryna oblystyq bıýdjetten 995,9 mln teńge qarjy bólinedi. Atalǵan jumystar aıaqtalǵan jaǵdaıda 3 005 gektarǵa sýarmaly jerdiń jaǵdaıy jaqsaryp, 1 000 gektar sýarmaly jer jańadan aınalymǵa qosylady.
«Ońtústik Qazaqsan oblysy agrarlyq aımaq sanalady jáne aýyl sharýashylyǵynyń bolashaǵy jerdiń sapasy men qunarlyǵyna tikeleı baılanysty bolǵandyqtan, atalǵan máseleni sheshý mańyzdy», - dedi oblys ákimi Janseıit Túımebaev.
Al, Eýropa qaıta qurý jáne damý bankiniń qarjylandyrýymen Shardara aýdanyndaǵy Jaýshyqum alqabyn sýlandyrý, Otyrar aýdanyndaǵy Sháýildir ústeme kanalyn jáne 368 shaqyrymdyq kollektor-drenaj júıelerin, Ordabasy aýdanyndaǵy R-5 kanalyn qaıta qurý jobasyn iske asyrý pysyqtaldy. Nátıjesinde 13,5 myń gektar jerdi sýmen qamtamasyz etý jaqsarady, 20 myń gektar sýarmaly jer jańadan aınalymǵa qosylady.
Sondaı-aq, Dúnıejúzilik damý bankiniń qarjylandyrýymen IDJJ-2 baǵdarlamasy arqyly Maqtaral aýdanynda 39 757 gektar, Shardara aýdanyndaǵy 20 630 gektar jáne Túrkistan qalasynda 10 000 gektar jerge sýarý júıeleriniń qaıta jańartý jáne qaıta qurý boıynsha jumystar júrgizý josparlanyp otyr. Qazirgi tańda, Avstralııalyq «SMEG» fırmasy atalǵan baǵdarlamaǵa jobalaý jumystaryn júrgizip jatyr.
Budan bólek, oblysta sýdy únemdeıtin jańa ınnovatsııalyq tehnologııalardy qoldaný ádisi engizilýde. Bul maqsatqa oblystyq bıýdjet esebinen 18,3 mln teńge bólinip, Taraz qalasyndaǵy «Qazaq sý sharýashylyǵy» ǵylymı zertteý ınstıtýty shyǵarǵan «Kollektorlyq drenajdyq sýlardy fosfogıt melıorantyn paıdalaný arqyly aǵyn sýdyń tapshylyǵyn azaıtý» jobasy óndiriske enip otyr. Nátıjesinde bul óńirdegi jalpy aǵyn sý tapshylyǵyn 10 paıyzǵa deıin azaıtýǵa múmkindik bermek.
Májilisti qorytyndylaǵan aımaq basshysy aýdan, qala ákimderine tasqyn sýlardy ustap, jınaqtaıtyn sý qurylystaryn salý men «Dostyq» memleketaralyq kanalyn aǵyn sýmen qamtamasyz etýdi jáne kollektorlardyń sýyn paıdalaný múmkindikterin qarastyrý jóninde tapsyrmalar berdi. Sonymen qatar, sýarmaly jerlerdiń jaǵdaıyn jaqsartý boıynsha sharýa qojalyqtarymen turaqty túrde jumys júrgizýmen qatar kanaldyń qýattylyǵyn arttyrý boıynsha naqty usynystar engizýdi júktedi.
