OQO-da bıyl Alǵys aıtý kúni on kún boıy atalyp ótedi

ShYMKENT. QazAqparat - Bıyl 1 naýryz - Alǵys aıtý kúni Ońtústik Qazaqstan oblysynda erekshe uıymdastyrylmaq. Bul týraly búgin óńirlik kommýnıkatsııalar qyzmetinde ótken brıfıngte Oblystyq Qazaqstan Halqy Assambleıasy tóraǵasynyń orynbasary, hatshylyq meńgerýshisi Muratáli Qalmuratov málimdedi, dep habarlaıdy QazAqparat tilshisi.

Spıkerdiń sózinshe, jańa sıpatta ári jańa mazmunda ótkiziletin merekelik sharalar óńirde 20 aqpannan bastalyp, 1 naýryzǵa deıin jalǵasady. Máselen 20 aqpan - Tarıhqa taǵzym kúni bolsa, 21 aqpan - Qaıyrymdylyq kúni retinde ótedi. Al, 22 aqpan - Shabyt kúni, 23 aqpan - Kórshige izet kúni, 24 aqpan - Tazalyq kúni, 25 aqpan - Qurmet kúni, 26 aqpan - Ólketaný kúni, 27 aqpan - Kelisim kúni, 28 aqpan - Yqylas kúni, 1 naýryz - Alǵys aıtý kúni bolmaq.

«Onkúndik is-sharalar búgin «Tarıhqa taǵzym kúnimen» bastaý aldy. Oblystyq «Qazaqstan halqy Assambleıasy» ǵımaratynda deportatsııa jyldary Qazaqstanǵa taǵdyr tálkegimen qonys aýdarǵan etnostardyń ótkeni men búgini týraly kitaptar, foto, tarıhı qujattar men jádigerler qoıylǵan arnaıy kórme uıymdastyryldy. Sondaı-aq, «Qazaq eline myń alǵys!» monýmentiniń aldynda túrli etnos ókilderi qıyn-qystaý kezeńde pana bolǵan qazaq eline alǵys aıtyp, patrıottyq taqyrypta óleńder oqydy»,- dedi Muratáli Qalmuratov.