OQO-da bıyl 87 eldi mekenniń elektr júıleri jańǵyrtyldy
ASTANA. QazAqparat - Bıylǵy jyly Ońtústik Qazaqstan oblysynda jańartylatyn kún, jel, sý energııasyn paıdalanatyn jobalar kezeń-kezeńimen iske asyryla bastady, dep habarlaıdy óńirlik ákimdiktiń baspasóz qyzmeti.
Oblys ákimi Janseıit Túımebaevtyń bastamasymen bıyl Saıram jáne Qazyǵurt aýdandarynda eki shaǵyn sý elektr stantsııasy men Shymkent qalasynda Ortalyq Azııada teńdesi joq bıogaz qondyrǵylar kesheni iske qosyldy. Sondaı-aq, Saryaǵash jáne Maqtaral aýdandarynda eki iri kún elektr stantsııasynyń qurylys jumystary bastaý aldy.
Budan bólek, Tólebı aýdanynda qýaty 2,5 megavatt shaǵyn sý elektr stantsııasyn 2018 jyly paıdalanýǵa berý josparlanyp otyr. Sonymen qatar, Saryaǵash aýdanynda jalpy qýaty 5 megavatt shaǵyn sý elektr stantsııasy men Otyrar aýdanynda 35 megavatt kún elektr stantsııasynyń qurylysyn júrgizý josparda bar.
Oblys boıynsha jalpy 844 eldi mekenniń 828-i ortalyqtandyrylǵan elektr jelisimen qamtylǵan. Onda 2 mln 780 myń halyq turady. 16 eldi meken ıaǵnı, shalǵaıdaǵy malshy aýyldar derbes elektr qondyrǵylarymen qamtamasyz etilgen.
Bıyl oblys halqyn, ekonomıkasy men orta jáne shaǵyn bıznestiń turaqty damýyn qamtamasyz etýge baǵyttalǵan 14 iri qosalqy stantsııalardyń qurylysy qolǵa alynǵan bolatyn. Olardyń tórteýi 220 kılovolttyq bolsa, 10-y 110 kılovolttyq qosalqy stantsııa sanalady.
2017 jyly respýblıkalyq, oblystyq bıýdjetterden 13,9 mlrd. teńge bólinip, 59 nysannyń qurylys jumystary júrgizilýde. Sonyń ishinde «Nurly jer» baǵdarlamasymen Saryaǵash aýdanyndaǵy 15 jobaǵa Ulttyq qordan 2 320,3 mln. teńge bólingen. Bıyldyń ózinde oblys boıynsha 87 eldi mekendegi 47 nysannyń qurylysy aıaqtalyp, el ıgiligine tapsyryldy. Nátıjesinde 87 myń 100 turǵyn men áleýmettik, shaǵyn bıznes nysandary turaqty, sapaly elektr energııaǵa qol jetkizdi.
Oblys ekonomıkasy men orta, shaǵyn bıznestiń turaqty damýyn qamtamasyz etý maqsatynda kelesi iri qosalqy stantsııalardyń qurylysy júrgizilýde. Máselen, jalpy quny 22 mlrd. teńgeni quraıtyn Shymkent qalasyndaǵy 220 kılovolttyq "Bozaryq", 110 kılovolttyq "Astana 1" jáne "Astana 2" jáne Saryaǵash aýdanynda 220 kılovolttyq "Qyzylásker" qosalqy stantsııalarynyń qurylysy júrgizilýde. Atalǵan jobalar tolyq iske asqannan keıin 1 mln. 200 myń halyq, ónerkásip jáne aýyl sharýashylyq nysandary turaqty jáne sapaly elektr energııamen qamtylady.
2018 jyly jalpy quny 14 mlrd. teńgeni quraıtyn 110 kılovolttyq "Alataý ", "Aqjar " jáne "1M1 " qosalqy stantsııalardyń qurylysyn memlekettik-jekemenshik áriptestik aıasynda iske asyrý josparlanýda.
