OQO-da bıyl 50 myńnan astam azamat júrgizýshi kýáligin alǵan
ASTANA. QazAqparat - Ońtústik Qazaqstan oblysy Shymkent qalasyndaǵy mamandandyrylǵan HQKO 10 aıda azamattardan 175 myńǵa jýyq qujat qabyldaǵan. Sondaı-aq, 51 794 júrgizýshi kýáligi berilgen. Bul týraly OQO óńirlik kommýnıkatsııalar qyzmetinde ótken brıfıngte oblystyq «Halyqqa qyzmet kórsetý ortalyǵy» departamentiniń dırektory Erkebulan Álseıitov málimdedi.
Qazirgi tańda «Dostyq» shaǵyn aýdanynda ornalasqan mamandandyrylǵan HQKO-da azamattar óz avtokólikterin qaıta tirkeýden ótkizip, qajetti kategorııa úshin tájirıbelik emtıhandy tapsyra alady. Sondaı-aq, mamandandyrylǵan ortalyqta júrgizýshi kýáligin alý úshin medıtsınalyq tekserýden ótýge de múmkindik bar.
«Aıta ketetini, daıyn júrgizýshi kýáligin kez kelgen Shymkent qalasyndaǵy HQKO-dan alýǵa bolatyn joba iske qosyldy. Pılottyq joba qyzmet alýshylardyń ýaqytyn únemdeýge jáne mamandandyrylǵan ortalyqtarda kezekti azaıtýǵa múmkindik beredi», - dedi Erkebulan Asanbaıuly.
Departament dırektorynyń málimdeýinshe, aǵymdaǵy jyldyń maýsym aıynan bastap jańa «Táýlik boıy» jumys isteıtin pılottyq jobasy iske qosylǵan. Joba negizinde qala turǵyndary men qonaqtary saǵat 20.00 men 24.00 aralyǵynda memlekettik qyzmetterdi alýǵa ótinish bere alady. Maýsym aıynan bastap «Táýlik boıy» jumys rejıminde azamattarǵa 3500-ǵa jýyq qyzmet kórsetilgen.
Sondaı-aq, www.egov.kz elektrondyq úkimet portalynda árbir paıdalanýshyǵa jeke kabınet jumys isteıdi. Onda túrli málimetter jáne paıdaly servıstik qyzmet túrleri engizilgen. Máselen, kez kelgen azamat ákimshilik aıyppuldar jaıly aqparat alyp, turǵyn-úıge kezekke jáne nekege turý syndy qyzmetterdi paıdalana alady
