OQO-da bıyl 5 myńnan astam páter paıdalanýǵa berildi

ShYMKENT. QazAqparat - Ońtústik Qazaqstan oblysynda bıylǵy jyldyń 10 aıynyń qorytyndysy boıynsha paıdalanýǵa berilgen turǵyn úıdiń jalpy kólemi 526 myń sharshy metrdi (5 246 páter) quraǵan. Bul týraly OQO óńirlik kommýnıkatsııalar qyzmeti uıymdastyrǵan kóshpeli brıfıngte Shymkent qalalyq qurylys bóliminiń basshysy Ábilseıit Rabaev málim etti dep habarlaıdy QazAqparat.

Bul kórsetkish byltyrǵy jylmen salystyrǵanda 20,9 paıyzǵa artyp otyr. Al oblys ortalyǵy Shymkent qalasynda bıyl jalpy aýmaǵy 302 myń sharshy metrlik 5 myńnan astam páter el ıgiligine beriledi.

Sonymen qatar, «Nurly jer» turǵyn úı baǵdarlamasy aıasynda oblysta qurylysy josparlanǵan 231 nysannyń jyl sońyna deıin 115-in paıdalanýǵa tapsyrý mejelengen. Al jyldyń basynan 1-qarashaǵa deıin 61 nysan paıdalanýǵa tapsyrylǵan. Qalǵan 54 nysan jyl sońyna deıin paıdalanýǵa berilmek. Sondaı-aq, Shymkent qalasynda bıyl 201 turǵyn úıdiń qurylysy júrgizilýde.

«Aıta keterligi, Shymkentke jalpy quny 22,5 mlrd teńgege 46 turǵyn úıdiń qurylysy júrgizilýde. Onyń ishinde ákimshilik-iskerlik ortalyǵynda 32, arendalyq 16, dál sondaı nesıelik 16 turǵyn úı salynýda. Budan bólek «Shymkent sıtı» shaǵyn aýdanynda jalpy 14 turǵyn úıdiń qurylysy júrgizilip keledi», - dedi Ábilseıit Rabaev.

Sonymen qatar, «Turǵyn úı qurylys jınaq banki» AQ oblystyq fılıaly dırektorynyń orynbasary Aqylbek Qospanovtyń aıtýynsha, atalǵan bank júıesi boıynsha bıyl óńirde 982 páter paıdalanýǵa beriledi. Al 2018 jyly «Nurly Jer» baǵdarlamasy aıasynda oblys ortalyǵy Shymkent qalasynda 2 500-ge jýyq páter salý josparlanǵan.

«3-dárejeli baspananyń sharshy metri 140 myń teńge. Jalpy qazirgi tańda oblys boıynsha 57 myńǵa jýyq salymshylarymyz bar. Al olardan jınaqtalǵan soma 27 mlrd teńgeden asady. Sondaı-aq, baspanany alýdyń tártibine toqtala ketsek, konkýrstan ótken salymshy úıdiń jalpy qunynyń 30 paıyzyn jınaqtaý kerek.  Qalǵan 70 paıyzyn bank 5 paıyzdyq mólshermen 6-15 jylǵa deıin nesıege beretin bolady», - dedi Aqylbek Qospanov.

Aıta keterligi, «Nurly jer», «Nurly jol» baǵdarlamalary boıynsha halyqqa turǵyn úıdiń qoljetimdiligin arttyrý barysynda paıyzdyq ústemeler 5 paıyzdan da tómendetildi.