OQO-da bıyl 340 myń gektar aýmaqta shegirtke shoǵyrynyń bary anyqtaldy

Aýmaqtyq ınspektsııanyń basshysy Nurjan Qashqynovtyń aıtýynsha, aǵymdaǵy jyly óńirde zııankesterdiń bar-joǵyn anyqtaý úshin 1 mıllıon gektar jerde zertteý jumystary júrgizilgen. Nátıjesinde, 11 aýdannyń aýmaǵyndaǵy 340 959 gektar aýmaqta shegirtke shoǵyrynyń bary belgili boldy. Endi oblystyq aýmaqtyq ınspektsııa sol jerlerde zalalsyzdandyrý jumystaryn júrgizedi. Ol úshin arnaıy shtab qurylyp, jumystar júıelenýde.

«Ol shtabtyń tóraǵasy - oblys ákiminiń birinshi orynbasary Álipbek Óserbaev. Sondaı-aq aýylsharýashylyǵy basqarmasy men tótenshe jaǵdaılar departamentinen mamandar, barlyq aýdan qala ákimderi bar. Búginde kúres jumystaryna baılanysty naqty jumys josparlary bekitildi»,-deıdi Nurjan Qashqynov .

Inspektsııa basshysynyń sózinshe, zııankesterden keler qaýiptiń aldyn alý úshin 350 myń gektar aýmaq zalalsyzdandyrylady. 340 myń gektar jerge naq osy zııankes tuqymyna qarsy dári sebilse, ózge aýmaqtarǵa azııalyq jáne ıtalıandyq zııankesterdiń kózin joıý úshin hımııalyq óńdeý júrgizilmek. Negizgi jumystar kelesi aıdyń alǵashqy 10 kúndiginde bastalady dep kútilýde. Ol  jumystarǵa arnaıy tehnıkasy bar 3 seriktestik tartylady dep josparlanǵan. Odan bólek, 500-den astam adam jumyldyrylady. Al,zııankester mekendegen aýmaqtyń 50 paıyzy jerústi agregatymen óńdelse, 137 myń gektarǵa ushaqtararqyly dári sebiledi. Osyndaı ádisterdiń arqasynda shegirtkelerdiń qanaty qataımaı jatyp, kózi joıylýy tıis.
 

«Qazir qajetti dári-dármek satylyp alynyp qoıdy. Endi fıtosanıtarlyq dıagnostıka jáne boljamdar ortalyǵynyń habarlamasyn kútip otyrmyz. Eger sol ortalyq shegirtkelerdiń jer betine shyqqanyn habarlasa, barlyq mekemelerdiń basyn qosyp jumystardy bastaımyz»,-deıdi Oblystyq aýmaqtaq ınspektsııa basshysy.

Mamandardyń málimetinshe bıylǵy zııankester shoǵyrlanǵan aýmaq ótken jylǵydan 80 myń gektarǵa azaıǵany anyqtalyp otyr. Bul byltyrǵy jumystyń nátıjeli bolǵanyn kórsetken.