OQO-da bıyl 17 myń pedagog biliktiligin arttyrdy
ShYMKENT. QazAqparat - Ońtústik Qazaqstan oblysynda 2017 jyly 17 myń pedagog biliktiligin arttyrdy. Sondaı-aq, aýdandarda mobıldi toptar qurylyp, oblystyń aldyńǵy qatarly muǵalimderi áriptesterine onlaın rejıminde sabaq ótkizip, ozyq tájirıbelerimen bólisýde. Bul týraly OQO óńirlik kommýnıkatsııalar qyzmetinde ótken brıfıngte oblystyq bilim basqarmasynyń basshysy Isataı Saǵyndyqov málim etti.
Onyń aıtýynsha, óńirdegi 61 mektep bıologııa, hımııa, fızıka jáne ınformatıka pánderin aǵylshyn tilinde oqytýdy bastaǵan pılottyq mektepterdiń tizimine enip otyr. Sonymen qatar, oblys boıynsha 18 jasqa deıingi damý múmkindigi shekteýli bala sany 35 myńnan asqan. Oblysymyzda erekshe bilim berýdi qajet etetin balalarǵa arnalǵan arnaıy 12 mektep-ınternattar, 5 balabaqsha men keńes berý mekemeleri jáne ońaltý ortalyǵy qyzmet etedi.
«Sondaı-aq, «Barshaǵa tegin kásiptik-tehnıkalyq bilim» jobasy negizinde oblysta 2017-2018 oqý jylynda 75 myńǵa jýyq stýdent bilim alýda. Oblystyq bıýdjet esebinen 91 mamandyq jáne 160 biliktilik boıynsha mamandar daıarlanýda. Atalǵan memlekettik baǵdarlama aıasynda kópbalaly otbasynan 3 myńǵa jýyq bala, 220 jetim bala jáne az qamtylǵan otbasynan 8 myńnan astam bala bilim alýda», - dedi Isataı Ómirzaquly.
Budan bólek, «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń» birinshi baǵyty boıynsha 4 500-den astam stýdent 26 jumysshy mamandyqtary boıynsha oqýmen qamtylǵan.
Aıta ketetini, bilim basqarmasy tarapynan oblystaǵy bilim berý uıymdarynyń basshylaryn taǵaıyndaý úshin arnaıy komıssııa qurylyp otyr. Qazirgi tańda komıssııasynyń úsh otyrysy ótip, oǵan jalpy sany 131 úmitker qatysypty. Nátıjesinde barlyq úmitkerdiń 120-sy zań talaptaryna sáıkes keledi dep tanylsa, komıssııa sheshimimen qalǵan 11 úmitkerdiń biliktilik talaptaryna sáıkes kelmeıtini anyqtalǵan.
