OQO-da bir jylda 78 myńnan asa sábı dúnıege kelgen
ShYMKENT. QazAqparat - Ońtústik Qazaqstan oblysy respýblıka boıynsha týý men tabıǵı ósimi kórsetkishteri boıynsha kósh bastap tur. Ótken jyly óńirde 78 810 bala dúnıege kelgen. Bul týraly Óńirlik kommýnıkatsııalar qyzmetinde ótken baspasóz máslıhatynda oblystyq statıstıka departamentiniń basshysy Aıdar Ábildabekov málim etti, dep habarlaıdy QazAqparat tilshisi.
2017 jylǵy óńirdiń áleýmettik-ekonomıkalyq damýyn baıandaǵan departament basshysy oblystaǵy turǵyndardyń sany 2 mln 923 myńnan asqanyn atap ótti. Sóıtip halyq sany ońtústik óńiri elimiz boıynsha alǵashqy orynǵa turaqtaǵan. Buǵan tikeleı tabıǵı ósim, ıaǵnı halyqtyń týǵandar men ólgender sanynyń ózgerýi jáne kóshi-qon ósimi (kelgender jáne ketkender) áser etken.
«Ótken jylǵy qańtar-qarashada kóshi-qonmen oblysqa kelgen halyqtyń sany 23 956 adamdy qurady. Onyń ishinde 22 556 adam Qazaqstannyń basqa oblystarynan, 1293 - yntymaqtastyq elderinen, 107 adam - alys shetelderden kelgender», - dedi Aıdar Ábildabekov.
Al, halyqtyń ortasha bir aıda jan basyna shaqqandaǵy ataýly aqshalaı tabystary 43 509 teńgeni quraǵan.
Jurttyń aqshalaı shyǵystarynyń 95,8 paıyzy tutyný shyǵystaryna, ıaǵnı azyq túlik jáne azyq túlik emes taýarlary men aqyly qyzmetterge tıesili bolǵan.
