OQO-da bir jylda 26 mıllıonǵa jýyq memlekettik qyzmet kórsetilgen
Kórsetilgen memlekettik qyzmettiń 2 mıllıonnan astamy qaǵaz júzinde júrgizilgen. Bul týraly Shymkent qalasynda ótken oqý semınarynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamentiniń basshysy Álı Kómekbaev aıtty.
Halyqty memlekettik korporatsııa jáne elektrondyq túrde qyzmet alýǵa shaqyrý maqsatynda uıymdastyrylǵan basqosýǵa oblystyń aýdan, qala ákimderi bastaǵan memlekettik qyzmetshileri, Halyqqa qyzmet kórsetý ortalyqtarynyń bólimshe basshylary men joǵary oqý oryndarynyń oqytýshylyq quramy qatysty. Jıynda sóz alǵan departament basshysy sybaılas jemqorlyqqa jaǵdaı týǵyzatyn sebepterdiń birine toqtaldy.
«Halyqqa qyzmet kórsetýde memlekettik qyzmetkerler men azamattardyń tikeleı jolyǵýy kóbinde sybaılas jemqorlyqtyń týyndaýyna sebep bolyp jatady. Osyndaı tikeleı baılanystan keńsege túsken ótinishterdiń oryndalý merziminiń buzylýy, qosymsha qujattardyń suratylýy sııaqty ákimshilik kedergiler týyndaýy múmkin. Sondyqtan búgingi semınarymyzdyń kóterip otyrǵan taqyryby aýqymdy», - dedi Álı Amantaıuly.
Aıta keteıik, aǵymdaǵy jyly úsh kezeńde memlekettik qyzmet kórsetýge jaýapty mamandar úshin master-klasstar ótkizildi. Qazirgi tańda departament tarapynan elektrondyq úkimet portaly arqyly qyzmet alý tásilderin úıretetin beınerolıkter ázirlenip, oblystyń barlyq memlekettik qyzmetkerleriniń kompıýterlerine engizilgen.
