OQO-da bir úıir jylqyny aıdap ketken eki barymtashy qolǵa tústi
ASTANA. QazAqparat - Tólebı AІІB qyzmetkerleri jergilikti turǵynnyń bir úıir jylqysyn urlap ketken eki barymtashyny ustady, dep habarlaıdy OQO ІІD baspasóz qyzmeti.
Tólebı AІІB kezekshi bólimine 44 jastaǵy azamat aryzdanǵan. Onda ótken jyldyń jazynda jaıylyp júrgen 29 bas jylqysyn bireý urlap ketkeni kórsetilgen. Jábirlenýshige keltirilgen shyǵyn kólemi jalpy 6 mıllıon teńgeden asqan.
Atalǵan jaıt Tólebı AІІB tirkelip, QR QK 188-babymen qylmystyq is qozǵaldy. Qylmysty ashý maqsatynda tájirıbeli polıtseılerden jedel-izdestirý toby qurylǵan.
Tólebı AІІB tártip saqshylary júrgizgen jedel is-shara nátıjesinde mal urlyǵyna kúdikti eki barymtashy ustaldy. Olar 1968 jáne 1969 jyly týǵan Shymkent qalasynyń jáne Tólebı aýdanynyń turǵyndary.
Tergeý barysynda anyqtalǵany, kúdiktiler mal ıesiniń joqtyǵyn paıdalanyp jylqyny jaıylymnan Arys aýdanyna aıdap áketken. Sonda satyp, aqshasyn óz qajettilikterine jumsaǵan.
Qazirgi tańda polıtseıler kúdiktilerdiń ózge de qylmysqa qatystylyǵyn tekserýde. Aıǵaqty zat retinde urlanǵan maldyń bir bóligi ıesine qaıtaryldy. Sotqa deıingi tergeý amaldary júrgizilýde.
