OQO-da bir úıdiń eki balasyn kólikpen qaǵyp óltirgen júrgizýshi bes jylǵa sottaldy
ShYMKENT. QazAqparat - Ońtústik Qazaqstan oblysynda bir úıdiń eki balasyn qaǵyp, baqılyq etken júrgizýshi bes jylǵa sottaldy. Alaıda eki jasóspirimniń ata-anasy sot sheshimimen kelispeı, oblystyq sotqa shaǵymdandy, - dep habarlaıdy QazAqparat HAA tilshisi.
Eske salaıyq, qaıǵyly oqıǵa ótken jyldyń qyrkúıek aıynda Saryaǵash aýdanyna qarasty Alpamys batyr aýylynda bolǵan edi. 13 jastaǵy Márzııa men onyń alty jasar inisi Meırambekti sol aýyldyń turǵyny kólikpen qaǵyp ketken. Saldarynan eki bala da aýyr jaraqattan jan tásilim etti. Al jol apatyn jasaǵan júrgizýshi ýaqytsha tergeý abaqtysyna qamalǵan bolatyn. Іsti qaraǵan Saryaǵash aýdandyq soty kináli júrgizýshini bes jylǵa bas bostandyǵynan aıyrdy. Jazasyn qonys kolonııasynda óteýi tıis dep belgiledi. Alaıda jábirlenýshi jaq bul úkimmen kelispeı, oblystyq sottyń appelıatsııalyq alqasyna shaǵym túsirgen.
«Ol bar bolǵany bes jylǵa sottaldy, al men eki birdeı perzentimnen aıyrylyp otyrmyn. Mundaı sheshimmen men múldem kelispeımin, ony tym bolmaǵanda on jylǵa sottaý kerek. Sol úshin biz obystyq sotqa qaıta shaǵym túsirdik», - deıdi ashynǵan ana Darıǵa Orazova.
Búgin oblystyq sottyń qylmystyq ister jónindegi alqasynda osy is boıynsha alǵashqy sot otyrysy ótti. Endigi kezekte jábirlenýshi jaqqa appelıatsııalyq alqanyń qandaı úkim shyǵaratynyn kútýden basqa amal qalmaı tur.
