OQO-da bir top jastardyń tóbelesýine baılanysty qylmystyq is qozǵaldy
ShYMKENT. QazAqparat - Ońtústik Qazaqstan oblysynda bir top jastardyń tóbelesip, pyshaqtasýyna baılanysty qylmystyq is qozǵaldy, dep habarlaıdy QazAqparat tilshisi.
«Osy derek Qazyǵurt aýdandyq polıtsııa bóliminiń sotqa deıingi tergep-tekserý birińǵaı tizimine engizildi. Qylmystyq kodekstiń 106 «Densaýlyqqa qasaqana aýyr zııan keltirý» jáne 293 «Buzaqylyq» baptary boıynsha qylmystyq is qozǵaldy. Qazirgi tańda, bolǵan oqıǵa boıynsha jan-jaqty tekserý jumystary júrgizilýde»,- delingen oblystyq ІІD baspasóz qyzmeti taratqan habarlamada.
Eske salaıyq, jastar arasyndaǵy tóbeles Shymkent qalasyna qarasty Rabat turǵyn alabynda bolǵan. Sonyń saldarynan 6 jigit jedel járdemmen oblys ortalyǵyndaǵy aýrýhanaǵa jetkizilgen. Beseýiniń jaǵdaıy jaqsy bolǵanymen, 23 jastaǵy jergilikti turǵyn jansaqtaý bóliminde jatyr. 23 jastaǵy Baqdáýlet Úmbetov búgin esin jıyp, tilshilerge suhbat berdi. Onyń aıtýynsha, denesine belgisiz bireýler pyshaq suǵyp alǵan. Áreń tynys alyp jatqan naýqas qylmystyq iske esh qatysy joq ekenin aıtady.
«Baryp qaldym, tóbeles bastalyp ketti. Boldy. Kim kimdi pyshaqtap jatyr, men qaıdan tanımyn ony. Quladym sonymen boldy»,- deıdi naýqas jigit.
Qazir Qazyǵurt aýdanynyń tártip saqshylary anyqtaý sharalaryn bastap ketti. Tóbeleske qatysqan ózge de jastar izdestirilip jatyr.
