OQO-da bilim nysandaryna 31,9 mlrd teńge bólingen
ShYMKENT. QazAqparat - Ońtústik Qazaqstan oblysynda aǵymdaǵy jyly 11-synypty bitirgen 33 myń mektep bitirýshiniń ornyna 73 myńnan astam oqýshy birinshi synypqa qabyldanǵan.
Nátıjesinde óńirde oqýshy ornyna degen tapshylyq baıqalýda. Atalǵan máseleni sheshý maqsatynda 2017 jyly oblys kólemindegi 79 bilim nysanynyń qurylysyna 31,9 mlrd teńge baǵyttalyp, bıyl 31 nysandy paıdalanýǵa berý josparlanǵan. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq bilim basqarmasynyń basshysy Isataı Saǵyndyqov málim etti, dep habarlaıdy óńir basshysynyń baspasóz qyzmeti.
I. Saǵyndyqovtyń aıtýynsha, 2017-2018 oqý jylynda oblystaǵy 1038 mektepte 634 myńǵa jýyq oqýshy bilim alýda. Sondaı-aq, bıylǵy oqý jylynda 992 mektep jumysy bes kúndik oqý aptasyna kóshirilgen. Onyń ishinde jańartylǵan bilim berý júıesine kóshken 1, 2, 5 jáne 7-synyptaǵy 300 myńǵa jýyq oqýshy bilim alady. Al mektepke deıingi tárbıe men oqytýǵa kelsek, aǵymdaǵy jyldyń 1 qarashadaǵy esebi boıynsha oblysta 1-6 jastaǵy 183 280 balany qamtıtyn 1700-den astam mektepke deıingi uıymdar jumys isteıdi.
«Olardyń 991-i jekemenshik, al bul jalpy mektepke deıingi uıymdardyń 58 paıyzyn quraıdy. 2017 jyly jalpy 8805 orynǵa 108 mektepke deıingi uıymdar iske qosyldy. Sondaı-aq, 3-6 jastaǵy balalardy mektepke deıingi bilimmen qamtý bıyl 82,5 paıyzǵa deıin ósti. Jyl sońyna deıin qosymsha 7 815 orynǵa laıyqtalǵan 45 mektepke deıingi uıymdar ashylyp, baldardy qamtý 85,5 paıyzdy quraıtyn bolady», -dedi Isataı Ómirzaquly.
Sonymen qatar, «Bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasyna» sáıkes, sońǵy bes jylda oblys mektepterine 40285 dana kompıýter satyp alynǵan. 2017 jyly 520 mektepke 2354 komplekt mýltımedııalyq quraldardy alý josparlanǵan.
Budan bólek, mektep oqýshylaryna arnalǵan elektrondy jýrnaldar men kúndelikterdiń kundelik.kz pılottyq jobasy óńirdegi 710 mektepte endirildi. Bul oblystaǵy mektepterdiń 69 paıyzyn quraıdy.
Sonymen qatar mektepterdi elektrondy bilim berý kontentimen qamtamasyz etý maqsatynda «Bilimland» bilim berý platformasyna qosý jumystary júrgizilýde. Atalǵan jobaǵa 1021 mektepti qosýǵa respýblıkalyq bıýdjetten 2017 jylǵa 222,2 mln. teńge qaralyp, nátıjesinde bilim mekemeleri elektrondy bilim berý kontentterine tolyq qosylǵan.
