OQO-da bes myńnan astam sharýa sýbsıdııaǵa qol jetkize almaı júr
ShYMKENT. QazAqparat - Ońtústik Qazaqstan oblysynda bes myńnan astam sharýa sýbsıdııaǵa qol jetkize almaı júr. Saıram aýdany dıqandarynyń aıtýynsha, kóktemgi egis naýqanyna dep bólingen mıllıondaǵan aqshany ótken jyly jergilikti ákimdiktegiler ıgere almaı, keri qaıtarǵan.
Saldarynan qarapaıym sharýa ketken shyǵynnyń óteýin kimnen alaryn bilmeı dal bolýda, dep habarlaıdy QazAqparat HAA tilshisi.
Saıram aýdanynda bes myńnan astam sharýa bar bolsa, olardyń barlyǵy ótken jyly egistikke berilýi tıis sýbsıdııadan qaǵylǵan. Sebebi, aýyl sharýashylyǵy salasyn sýbsıdııalaýdyń tártibi ózgergendikten ony qaıta qalpyna keltirip, qujat resmı kúshine engenshe jyldyń sońy bolypty.
«Bizge sala mamandary jańa erejeni kesh túsindirdi. Qujattardy da der kezinde tapsyra almadyq. Bul aýyl sharýashylyǵyn qoldaý emes qoı»,-deıdi ashynǵan sharýa.
Belgili bolǵandaı, Saıram aýdany ákimdigi sýbsıdııalaý baǵdarlamasy boıynsha 164 mıllıonnan astam teńgeniń bar-joǵy 16 mıllıonyn sharýalarǵa berip, qalǵan 148 mıllıon teńgesin ıgerý múmkindigi joq ekendigine baılanysty keri qaıtarǵan.
«Saıram aýdanynyń ákimshiligi 4 SH jáne 29 SH negizinde 5000-nan astam fermerge jańaǵy 148 mln teńgeden astam sýbsıdııa berý kerek edi. Al, olardyń jasap otyrǵan isi adamnyń aqylyna da, zańǵa da sáıkes kelmeıdi dep oılaımyn»,- deıdi Qazaqstan fermerler odaǵy oblystyq bólimshesiniń basshysy Júsip Sháripov. 
Sharýalardyń der kezinde memleket tarapynan beriletin qarajatty ala almaǵanyn sala mamandary da rastap otyr. Ári oǵan sharýalardyń kinási joq ekenin aıtady.
«Sol byltyrǵy qabyldanǵan tıisti normatıvtik quqyqtardyń keshigip shyǵýy sebep bolyp otyr. Bul jerde sharýalardyń eshqandaı kinási joq»,-deıdi Saıram aýdandyq aýyl sharýashylyǵy jáne jer qatynastary bóliminiń basshysy Nurpapa Kópeev.
