OQO-da bes balaly jalǵyzbasty anaǵa qaıyrymdy jandar baspana salyp berdi
Jibek Nálibaeva osy kúnge deıin bes birdeı perzentimen páter jaldap, talaı aýyr kúnderdi basynan ótkizip kelipti. Úıelmeli-súıelmeli bes balasymen kóship-qonýdyń azabyn tartqan áıel aqyry aýyldaǵy ımamdardan járdem suraǵan. Jalǵyzbasty qamkóńil ananyń jaǵdaıymen tanysqan din ókilderi jergilikti kásipkerler men qaltaly azamattardyń basyn qosyp, kómekke muqtaj januıaǵa baspana salyp berý týraly usynys tastaıdy. Bul usynysty qup kórgen azamattar Arys qalasynyń «Naýryz» móltek aýdanynan úsh bólmeli turǵyn úı salyp berdi.
«Bireý shatyryn jabatyn shıfryn berdi, bireý tsementyn berdi. Sóıtip qurylys materıaldary jınaldy. Sondaı-aq, meshittiń jamaǵaty men qala ımamdary da járdem berdi. «Kóp túkirse kól» demekshi, bári bárdeı jumyldy. Osy kisige násip etipti úı alý, ár jerde kóship qonyp júrgende. Kásipkerler qoldap qoshtady, Alla razy bolsyn», - deıdi Arys qalasynyń bas ımamy Abdýkamal Ábdýkerim.
Jańa úıdiń kiltin tabystaý rásimine halyq kóp jınaldy. Jańa úıdiń kiltin alǵan ana osyndaı qaıyrymdy istiń basynda júrgen azamattarǵa óz rızashylyǵyn bildirip, analyq alǵysyn aıtty. Tipti qýanyshtan kózine jas alyp, mundaı baspanaǵa qol jetkizý arman bolǵanyn aıtady.
«Kilitti aldym. Úıdiń ishine bala-shaǵamyzben kirip qýanyp jatyrmyz. Ásirese perzentterim qatty qýanyp otyr. Osy baspanaǵa atsalysqan azamattarymyz aman bolsyn. Olarǵa aıtar alǵysym sheksiz. Men sııaqty kóp balaly analarǵa, jaǵdaıy tómen otbasylarǵa da osyndaı qýanysh tiler edim», - deıdi Jibek Nálibaeva.
Aıta keteıik, toǵyz joldyń torabynda ornalasqan shaǵyn qalada buǵan deıin jaldamaly páterlerdi panalap kelgen jalǵyz basty anaǵa úı berilgen bolatyn. Ol kezde de áleýmettiń álsiz tobyna meshit ımamdary men jergilikti kásipkerler kómek qolyn sozdy. Osylaısha jetimin jylatpaǵan, jesirin jerge qaratpaǵan el azamattary qaıyrymdylyq jasaýdy dástúrge aınaldyryp keledi.
