OQO-da baýyr transplantatsııasy 9 adamǵa ómir syılady
ShYMKENT. QazAqparat - Ońtústik Qazaqstan oblysynda jasalyp jatqan baýyr transplantatsııasy jaqsy nátıje berip keledi. Óńirdiń dárigerleri osyndaı otalar arqyly 9 adamǵa ómir syılady, dep habarlaıdy QazAqparat HAA tilshisi.
Ońtústikte qazir baýyry aýyr halge jetken 500-den asa naýqas bar. Olar - gepatıt, baýyr isigi, baýyr tserrozy jáne basqa da túrli dertke dýshar bolǵandar. Sonyń ishinde, eń asqynǵany - baýyr tserrozy. Bul dıagnozǵa dýshar bolǵanǵa ómirin jalǵastyrýdyń jalǵyz joly bar. Ol - dimkás múshesine transplantatsııa jasaý ǵana. Búginde óńirdiń dárigerleri mundaı jandarǵa tek týǵan-týystarynyń baýyryn salýda. Degenmen mamandar bul tyǵyryqtan shyǵarmaıdy dep otyr.
«Aǵaıyndarynan baýyr alyp salýmen biz alysqa bara almaımyz. Bizge máıit transplantatsııasyn damytý kerek. Mı ólgen kezde, onyń júrek, baýyr-búıregin alyp salǵan ońaıyraq edi. Sebebi, tiri adamnyń dene múshesin alý qaýipti sanalady», - deıdi Shymkent qalalyq jedel medıtsınalyq kómek kórsetý aýrýhanasynyń bas dárigeri Mádı Begalıev.
Aýrýhanadaǵy naýqastardyń biri Abylaı orda buzar 30 jasqa taıaǵanda aýyr derttiń tyrnaǵyna ilikkenin aıtady. Aýrýyn elemeı júrgen 3 jyl ishinde ábden asqyndyryp alǵan. Aýrýhanadaǵy dárigerler oǵan 6 kún buryn baýyr almastyrý otasyn jasady. Týǵan aǵasynyń baýyrynan jartysyn kesip alyp, dimkáske salǵan. Al, Gúlnár Sartbaeva aǵzasyn osydan 2 jyl buryn almastyrǵan. 55 jastaǵy ol baýyr tserrozynyń zardabyn tartypty. Mańyzdy sheshim turǵanda óz perzenti meıirimdilik tanytyp, anasymen baýyryn bólisti. Ota bilikti dárigerler arqasynda sátti shyqty. Búginde aǵzasyn almastyrǵandardyń barlyǵynyń derlik jaǵdaıy jaqsy.
Aıta keteıik, óńirde osyndaı baýyr tserrozyna shaldyǵyp, shuǵyl transplantatsııany qajet etetin 200-ge tarta naýqas bar. Operatsııany jasaý sheteldegideı 150-200 myń dollar turmaıdy. Barlyǵy memlekettiń qoldaýymen tegin júzege asyrylady. Bar bolǵany baýyrymen denesindegi baýyryn bólisetin jan tabylsa bolǵany.
