OQO-da barymtashylar 5,5 mln teńgeniń jylqysyn urlap ketken
ShYMKENT.QazAqparat - Ońtústik Qazaqstan oblysynda barymtashylar 5,5 mln teńgeniń jylqysyn urlap ketken. Qoradaǵy maldarynan qaǵylǵan turǵyndar polıtsııaǵa aryzdanǵan, dep habarlaıdy «QazAqparat HAA tilshisi.
Saıram aýdandyq ishki ister basqarmasyna jergilikti 50 jastaǵy turǵyn kelip, úıinen jylqysyn urlap ketkenin aıtqan. Onyń sózinshe, belgisiz bireýler túndeletip qorasyna kirip, quny 2,5 mln teńge bolatyn jylqysyn qoldy etipti. Artynsha tártip saqshylaryna taǵy bir turǵyn aryz túsirgen. Ol da túndeletip qorasynan 3 mln teńge bolatyn eki malyn urlatqanyn aıtyp, kómek suraıdy. Osydan keıin basqarmanyń tájirıbeli qyzmetkerlerinen jedel-izdestirý tobly qurylyp, urylardy izdeýge kirisedi. Birneshe aıdan soń barymtashylardyń izine túsken polıtseıler osy qylmystarǵa qatysy bar degen eki kúdiktini ustady. 26 jáne 27 jastaǵy azamattardyń buryn osy syndy qylmys jasaǵandary úshin sotty bolǵany anyqtaldy. Jaýap alý barysynda olar jylqylardy da urlaǵanyn moıyndaǵan. Seziktilerdiń sózine qaraǵanda, túnde úı ıeleri jatty-aý degende, qoralardyń esigin buzyp kirip, jylqylardy minip ketip júripti. Olardy artynsha bazarlarǵa saýdalap, óz paıdalaryna jaratqan.
Tergeý barysynda jylqylar tabylyp, óz ıelerine qaıtaryldy. Óz kezeginde malymyz tabylmaıdy dep, úmitin úzgen aýyl turǵyndary kýanyp qaldy. Qazir qos kúdikti qamaýǵa alynyp, olardyń ústinen Qylmystyq kodekstiń 188-shi baby «Tonaýmen» is qozǵaldy. Tergeý amaldary júrgizilýde.
