OQO-da balasyn ólimshi etip sabaǵan anaǵa úkim shyqty
ShYMKENT. QazAqparat - Ońtústik Qazaqstan oblysynda 6 jasar balasyn ólimshi etip sabaǵan anaǵa qatysty sot úkimi shyqty, dep habarlaıdy QazAqparat tilshisi.
Oblystyq kámeletke tolmaǵandardyń isteri jónindegi mamandandyrylǵan aýdanaralyq soty 37 jastaǵy Nazıra Bekbaevany 5 jylǵa bas bostandyǵynan aıyrdy. Alaıda aıyptalýshy sot zalynan bosatyldy.
Aıta keteıik, keleńsiz jaǵdaı ótken jyldyń jeltoqsan aıynda Saıram aýdanyna qarasty Mádenı aýylynda bolǵan edi.
Aıyptalýshy Názıra Bekbaeva 6 jasar balasyn aıaýsyz uryp-soǵyp, aýyr soqqydan uly aýyr jaǵdaıda aýrýhanaǵa túsken bolatyn. Keıinnen polıtseıler alty jasar balany ólimshi etip sabaǵan anasyn qamaýǵa alyp, onyń ústinen Qylmystyq kodekstiń 106-baby 2-shi bóligi («Densaýlyqqa qasaqana aýyr zııan keltirý») boıynsha is qozǵaǵan.
Tergeý barysynda 37 jastaǵy kelinshek ulyn dápterge durys jazbaǵany úshin urǵanyn aıtqan edi. Sot otyrysy kezinde eki balasy bar Názıra Bekbaevanyń qylmysy tolyǵymen dáleldendi. Ol tipti óziniń balasyn taıaqpen urǵanyn moıyndap, jasaǵan áreketine ókinetinin aıtqan edi. Іsti qaraǵan sot tóraǵasy Qaırat Qońyrbaev aıyptalýshyny Qylmystyq kodekstiń Qylmystyq kodekstiń 106-baby 2-shi bóligi 4,11-tarmaqtarymen («Densaýlyqqa qasaqana aýyr zııan keltirý») jáne 140-babynyń 2- bóligimen kináli dep tapty.
«Siz balańyzǵa qasaqana aýyr dene jaraqatyn salǵansyz. Ony ózińizde sot otyrysy kezinde rastap, qýattadyńyz. Sondyqtan sot sizdi kináli dep tapty, biraq eki balańyz bar eken. Materıaldyq turmystyq jaǵdaıyńyzdy tolyq zerttedik. Bylaısha aıtqanda, eki bala dalada qalaıyn dep tur. Sondyqtan sizge túpkilikti 5 jylǵa bas bostandyǵynan aıyrý jazasyn taǵaıyndaı otyryp, asyraýyńyzda kámeletke tolmaǵan bir qyz, bir ul bar ekenin eskere otyryp, sot Qylmystyq kodekstiń 74-baby 1-bóligin qoldana otyryp, jazany óteý merzimin 5 jylǵa keıinge qaldyryp otyr. Osy ýaqyt aralyǵynda balalaryńyzǵa durystap tárbıe beresiz. Qyzyńyzdyń júregine ota jasaý kerek eken, sony jasatyńyz. Eger de osy merzim ishinde atalǵan sharttardy buzatyn bolsańyz, osyndaı jaǵdaı taǵy da qaıtalanatyn bolsa, onda jazańyz bas bostandyǵynan aıyrý jazasyna aýystyrylady»,-dedi sýdıa Qaırat Qońyrbaev.
Sot sondaı-aq, aıyptalýshyǵa sot tergeýi kezinde sot shyǵyndary men tıisti saraptamalarǵa ketken 436 258 teńgeni tóleýdi mindettedi. Sonymen qatar Saıram aýdandyq bilim bólimine Názıra Bekbaevanyń balalarynyń jaǵdaıyn qadaǵalap, tárbıe berý máselesin baqylaýǵa alýdy tapsyrdy. Sot zalynda aıyptalýshynyń qolynan kisen sheshilip, ol bosatyldy. Kózine jas alǵan kelinshek balalaryna durys qaraýǵa ýáde berdi.
«Sýdıa myrza, men balalaryma durys qaraımyn, durys tárbıe beremin dep ýáde beremin»,- dedi aıyptalýshy kelinshek.
Eske salaıyq, qazirgi tańda 7 jasar jetkinshek Shymkenttegi týystarynyń qolynda tárbıelenip jatyr. Aıyptalýshy áıeldiń ol baladan basqa taǵy 8 jasar qyzy bar. Ol júrek talmasyna shaldyqqan eken. Kúıeýi qaıtys bolǵan. Basynda baspanasy da joq jalǵyzbasty ana, týystaryn panalap júr. Osyny alǵa tartqan áıel sot barysynda sýdıadan bas bostandyǵynan aıyrmaýdy surap, balasy men týystarynan keshirim suraǵan bolatyn.
