OQO-da balany urǵan degen kúdikpen tárbıeshige qatysty tekserý taǵaıyndaldy
ShYMKENT. QazAqparat - Ońtústik Qazaqstan oblysynda balany urǵan degen kúdikpen balabaqsha tárbıeshisine qatysty tekserýler taǵaıyndaldy. Bul týraly óńirdiń ІІD baspasóz qyzmetiniń jetekshisi Saltanat Qarakózova málimdedi, dep habarlaıdy «QazAqparat HAA tilshisi.
Saltanat Qarakózovanyń sózinshe, kúni keshe Maqtaral aýdandyq polıtsııa basqarmasyna 5 jasar balanyń ata-anasynan aryz túsken. Onda Asyq ata kentindegi jekemenshik balabaqshalardyń birinde tárbıeshi balany uryp, denesinde kógergen izderi qalǵany kórsetilgen. Ári mundaı tártipke salý ádisteri bir emes, birneshe qaıtalanyp otyrǵanyn aıtqan.
«Bizge balanyń 27 jastaǵy anasy aryzdandy. Bizdiń qyzmetkerler aryzdy qabyldap aldy. Sol kúni kesheden bastap bul balabaqshada tekserý sharalary taǵaıyndaldy. Balanyń denesindegi kógergen izderi boıynsha birqatar sot-medıtsınalyq saraptamalar da júrgiziletin bolady. Sol saraptamalardyń qorytyndysy boıynsha naqty sheshim qabyldanady»,- deıdi Saltanat Qarakózova.
