OQO-da balamaly energııa kózderin óndirý qarqyn alýda
ASTANA. QazAqparat - Ońtústik Qazaqstan oblysy Báıdibek aýdanynda balamaly energııa kózderin óndirý jandanyp keledi. Bul týraly QazAqparat ákimniń baspasóz qyzmetine silteme jasap habarlaıdy.
Qazirgi tańda ónim qýattylyǵy 40 mVt bolatyn otandyq «Vetropark Júzimdik» JShS-i qajetti qujattaryn tolyq daıyndap, osy jyly qurylys jumystaryn bastaıdy. Búgin bul týraly OQO óńirlik kommýnıkatsııalar qyzmetinde ótken brıfıngte Báıdibek aýdanynyń ákimi Baqytbek Tanagózov málim etti.
Sonymen qatar, sheteldik «Emperial Renewabie Energy» JShS-i (qýattylyǵy 100 mVt) jáne «KK-Kiunsen» (qýattylyǵy 210 mVt) kásiporyndary jobalyq smetalyq qujattaryn ázirlese, atalǵan saladaǵy jumystardy aǵymdaǵy jyly tolyq aıaqtaý josparlanyp otyr.
Aýdan basshysynyń aıtýynsha, aǵymdaǵy jyly ındýstrıaldy aımaqta et jáne sút óńdeıtin jáne tabıǵı baılyqtardy óndiretin óndiris oryndaryn ornatý josparlanýda. Onyń biri et, sút jáne mal azyǵyn qaıta óńdeıtin «Shaıan ónimderi» agro kesheni. Jobalyq quny 1 500 mln. teńgeni quraıtyn kásiporyn jylyna 2000 tonna et, 2500 tonna sút, 5000 tonna mal azyǵyn óndirmek.
Sondaı-aq, aýdandaǵy ótken jyly negizgi kapıtalǵa tartylǵan ınvestıtsııa kóleminiń jospary 5 mlrd. teńge bolsa, jyl qorytyndysymen jalpy 34 mlrd. teńgeni qurap, 7 ese artyq oryndalǵan. Bul oblystaǵy eń joǵarǵy ósim kórsetkishi bolyp otyr.
«2017 jyly aımaqtaǵy jalpy óńirlik ónim kólemi 34,8 mlrd. teńgeni qurady. Byltyr aýdan bıýdjetiniń kiristeri 15,4 mlrd teńgege bekitilip, jyl qorytyndysymen 100,2 paıyzǵa artyǵymen oryndaldy. Óńirde ótken jyly ónerkásip óniminiń jalpy kólemi 3,1 mlrd. teńgege jetip, naqty ósim kólemi 103 paıyzdy qurady», - dedi Baqytbek Tólenuly.
Elbasy Joldaýynda eldiń ishki jalpy ónimindegi shaǵyn jáne orta bıznestiń úlesin 2050 jylǵa qaraı 50 paıyzǵa jetkizý tapsyrylǵan bolatyn. Osy oraıda aýdanda 3500-ge jýyq shaǵyn jáne orta bıznes sýbektileri jumys isteýde. Atalǵan saladaǵy óndirilgen ónim kólemi ótken jyly 7,3 mlrd. teńgeni quraǵan.
Aıta keterligi, Báıdibek aýdanyndaǵy aýyl sharýashylyǵy ónimderiniń jalpy kólemi ótken jyly 17,4 mlrd. teńge bolyp, naqty kólem ındeksi 105 paıyzǵa jetipti.
Budan ózge, qurylys jumystarynyń kólemi boıynsha aýdan oblysta aldyńǵy qatarda keledi.
«Ótken jyly aımaqta 74 nysannyń qurylysy júrgizildi. Byltyr 11519 sharshy metr turǵyn úı paıdalanýǵa berilip, 2016 jylmen salystyrǵanda 106,5 paıyzǵa artqan. 2018-2020 jyldar aralyǵynda 10 eldi mekende medıtsınalyq tirekterdiń, 4 eldi mekende feldsherlik-akýsherlik tirek qurylystaryn júrgizý kózdelgen», - dedi Baqytbek Tanagózov.
Infraqurylym máselesi boıynsha aýdandaǵy 52 eldi mekenniń 34-inde ortalyqtandyrylǵan aýyz sý qubyrlary júrgizilgen. Aǵymdaǵy jyly aýdannyń taza aýyz sýmen qamtylý deńgeıin 95 paıyzǵa jetkizý mejelengen. Sondaı-aq, 8 eldi mekende gaz júıesiniń ótpeli qurylystary aǵymdaǵy jyly aıaqtalady. Tabıǵı gazben qamtamasyz etý úshin ózge 14 eldi mekenniń sáýlettik-josparlaý tapsyrmalary ázirlenýde.
Aýdan ákiminiń málimdeýinshe, aımaqta «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń» úsh baǵyty boıynsha belgilengen mejeler tolyǵymen oryndalǵan.
«Balapan» baǵdarlamasy aıasynda mektepke deıingi balabaqshalar sany 20-ǵa jetip, qazirgi tańda aımaqtaǵy mektepke deıingi tárbıemen qamtý kórsetkishi 85,5 paıyzdy qurap otyr.
Elbasynyń tapsyrmasyna sáıkes, aýdanda aýyl jastaryn qoldaýǵa baǵyttalǵan «Dıplommen aýylǵa» jobasy sátti júzege asyp keledi. Máselen, ótken jyly baǵdarlamamen 57 jas kóterme járdemaqymen qamtylsa, 27-si turǵyn úı alýǵa nesıe alǵan.
