OQO-da balalar shahmaty damytylmaq
ASTANA. QazAqparat - Ońtústik Qazaqstan oblysynyń ákimi Janseıit Túımebaev Akademık Shahmardan Esenov atyndaǵy ǵylym jáne bilim qorynyń operatsııalyq dırektory Irına Grışenko hanymdy qabyldady, dep habarlaıdy oblystyq ákimdiktiń baspasóz qyzmeti.
Kezdesýde qos tarap «Túrkistan - túrki áleminiń mádenı astanasy» jylynyń qurmetine oraı ótken shahmat týrnıri men baýyrlas elderdiń yntymaqtastyǵy jaıyn sóz etti.
Sonymen qatar, ákim «Túrkistan - túrki áleminiń mádenı astanasy» jylyna oraı, óńirde uıymdastyrylatyn túrli baǵyttaǵy sharalardy atap ótip, olardyń mańyzdylyǵyna toqtaldy.
Munan bólek, aımaq basshysy sońǵy kezderi balalar shahmatynyń kórsetkishi boıynsha oblys Astana men Almatydan jáne basqa da óńirlerden artta qalyp kele jatqanyn tilge tıek etip, osy sport túrin damytý maqsatynda birqatar usynystaryn jetkizdi.
«Jasóspirimder arasynda shahmatty damytý maqsatynda balalardyń sporttyq sheberligin joǵarylatý úshin granttar bólinýi múmkin. Sonymen birge, halyqaralyq deńgeıde tájirıbe almasý maqsatynda Shymkent qalasynda balalar týrnırin ótkizýge bolady. Buryn Shymkent qalasynda tanymal sportshylardyń basyn qosqan jáne álem chımpıony Halıfman qatysqan «Túrkistan 1500» týrnıri ótkizilgen. Osyndaı týrnır OQO ákimdiginiń birlesýimen ótkizýge bolady. Biz jyl saıyn halyqaralyq formattaǵy QR eresekter Kýboktaryn ótkizip kelemiz, endi balalar shahmatyn damytýda da birlesip jumys isteýge shaqyramyn»,- dedi ákim.
Aıta keteıik, Shymkenttegi «Kórme ortalyǵynda» 23-29 maýsym aralyǵynda shahmattan jasóspirimder arasynda Qazaqstan Respýblıkasy balalar kýbogynyń 3-kezeńi men Ońtústik Qazaqstan oblysy ákiminiń kýbogy ótken bolatyn.
Týrnırge 6-14 jas aralyǵyndaǵy Qazaqstannyń barlyq oblysynan 270 jas sportshy qatysty. Bes kún boıyna jalǵasyn tapqan sporttyq shara oblys ákimdiginiń qoldaýymen ótti.
