OQO-da Azııa chempıony Ermek Qalymbetovtiń benefıs-shoýy ótti
ShYMKENT. QazAqparat - Ońtústik Qazaqstan oblysynda qolarba bıinen Azııa chempıony Ermek Qalymbetovtyń benefıs-shoýy ótti. Ónerli jan «Ómirim men ónerime ǵashyqpyn» atty keshinde kórermenge óziniń birneshe ánderin tartý etti, dep habarlaıdy QazAqparat tilshisi.
«Rýhanı jańǵyrý» maqalasy aıasynda uıymdastyrylǵan kezdesý Oblystyq jasóspirimder kitaphanasynda ótti. Keshti aqyn, Halyqaralyq Fızýlı syılyǵynyń ıegeri Qural Kómek ashyp, óner ıesine degen lebizin bildirdi. Jastarǵa úlgi bolatyn erekshe daryn ıesiniń ónegeli isine toqtalyp ótti.
Kesh barysynda Ermek Qalymbetovtyń ómiri jaıly beınerolık kórsetilip, ánderi shyrqaldy. Áýezdi ánimen, bıimen tanylǵan talantty jastyń «Assalaýmaǵaleıkým», «Baǵdarsham», «Allaǵa shúkir» ánderi oryndaldy. Sondaı-aq bı ónerine etene jaqyn talant ıesi áriptesi Aıjan Jakýlaevamen birge «Dolgo», «Janom-janom», «The show must go on» ánderine myń burala bıledi. Ol múmkindigi shekteýli bolǵanyna qaramastan aldyǵa qoıǵan maqsattarynyń qanshalyqty bıik ekenin óneri arqyly pash ete bildi. Darynı esi osy áreketteri arqyly óskeleń urpaqtyń ómirge degen qushtarlyǵyn arttyryp, jigerin janı tústi deýge bolady.
«Negizi men bıshi emespin, bıge degen qyzyǵýshylyq sportpen aınalysyp júrgenimde oıandy. Bos ýaqyttaryńyzdy zaıa ketirmeı, denderińizdiń, tánderińizdiń sulý bolýyna jumys jasańyzdar»,-dedi qolarba bıi túrinen Azııa chempıony.
Ermek Qalymbetovtyń ónerin qoldap júrgen ata-anasy kesh barysynda ulyna degen jyly lebizderin aıtyp, jaqsy tilekterin jetkizdi. Onyń ónerde júrgen dostary da ánderin shyrqap, keshtiń sánin keltirdi. Kezdesý sońynda óner ıesi kópshilikke «Qımaı turmyn» ánin oryndap, qımastyq sezimmen qoshtasty.
