OQO-da ájesi men jaqyndaryn aıaýsyz óltirgen 24 jastaǵy jigit ustaldy
ASTANA. 10 sáýir. QazAqparat - Ońtústik Qazaqstan oblysynyń polıtseıleri Qazyǵurt aýdany Qazyǵurt aýylyndaǵy úsh adamnyń ólimine qatysty eldi eleń etkizgen taǵy bir qylmystyń betin ashty.
Bul týraly QR ІІM baspasóz qyzmetiniń málimetterinde habarlanǵan.
Esterińizge sala keteıin, 7 sáýir kúni óz úıinde pyshaq jaraqaty salynǵan úı ıesiniń, atap aıtqanda, 66 jastaǵy áıel adamnyń jáne onyń eki qyzynyń máıitterin kórshileri taýyp aldy.
«Úı ıesiniń denesinen pyshaqtan bolǵan 12 jaraqat anyqtalsa, úlken qyzynyń ólimi - bas súıegine ashyq zaqym kelýinen bolǵany anyqtaldy. Al saraptama kórsetkendeı, 39 jastaǵy kishi qyzdyń denesinen 51 pyshaq jaraqaty, onyń ishinde 15 - tereń, sonyń 4-eýi júrek tusyna kirgendigi belgili boldy. Atalǵan qylmystyń birneshe kún buryn jasalǵandyǵy anyqtaldy»,-delingen bul málimetterde.
Jergilikti polıtsııa qyzmetkerleri qylmys kýágerlerin anyqtaý maqsatynda aýyl aınalasynda tekseris júrgizgenimen, ol aıtarlyqtaı nátıje bergen joq.
Jábirlenýshilerdi sońǵy saparǵa shyǵaryp salýǵa kelgen jaqyn týystaryn suraý barysynda olardyń biriniń - úı ıesiniń 24 jastaǵy nemeresiniń esh alańsyz turysy kúdik týǵyzǵan. Keıin belgili bolǵandaı qylmys jasaǵan kúni jas jigit jábirlenýshige qalalyq telefondy ajyratýǵa senimhat alýǵa keledi, biraq oǵan týystary senimhatty bermeıdi. Osy janjaldan keıin jigit mas kúıde kelip olardy óltirgen.
Sonymen birge kúdiktiniń páterin tintý kezinde qylmys quraly - pyshaq jáne qan izderi bar aıaq kıim tabyldy.
