OQO-da ájeler saıysy ótti
ShYMKENT. QazAqparat - Ońtústik Qazaqstan oblysy, Ordabasy aýdanynda el Táýelsizdiginiń 25 jyldyǵy aıasynda ardagerler keńesi men ájeler alqasynyń uıymdastyrýymen «Áje - ult uıytqysy» baıqaýy ótti, dep habarlaıdy oblys ákimdiginiń baspasóz qyzmeti.
Buǵan deıin aýdannyń birneshe aımaǵynda ájeler arasynda saıys ótip, atalǵan aqtyq synǵa óz aımaqtarynan úzdik shyqqan jeti áje qatysty. Baıqaýǵa qatysýshylar erejege saı, bes kezeń boıynsha ónerlerin kórsetip, túrli syndardan ótti. Máselen, olar umyt bola bastaǵan dástúrlerdi sahnalap, qazylardyń suraqtaryna jaýap berdi. Sheberlikteri men óneri de saralandy.
Kóp jyl bilim berý salasynda eńbek etken qajymuqandyq R.Álseıitova, urpaq tárbıesi boıynsha úıreteri mol shubarsýlyq T.Bólekbaeva, besik jyryn aıtyp, ul-qyz ósirgen bógendik Sh.Qalymbetova, aýyl anasy atanyp otyrǵan bórjarlyq N.Úsenova ómirden túıgenin ortaǵa saldy.
Al dombyrany ómirlik serik etken qaraqumdyq A.Nysan «Elimizdiń órkendep ósýine, kóp bizdiń qosar áli úlesimiz», - dep jyrlasa, 70 jasty jelkelegen badamdyq áje J.Ábdirahmanova «Jas kezden aıtqan ánimdi, 100 jasta da qoımamyn», - dep áýeletti. Sonymen qatar, Shubar aýyl okrýgi ájeler alqasynyń tóraıymy R.Ertaı «Aý-jar» saltynyń máni men maǵynasyn aıtyp, erte zamandaǵy qalyń maldyń qurbany bolǵan qyzdardyń muńyn ánmen jetkizdi.
Aýdandyq ardagerler keńesiniń tóraǵasy T.Ábdiqaıymuly is-sharany uıymdastyrýshy, aýdandyq ájeler alqasynyń tóraıymy A.Kókishevaǵa alǵysyn jetkizdi.
Qatysýshylardyń barlyǵyna erekshe alǵysyn bildirgen Aıgúl Seıitqyzy qazaq halqyndaǵy aqsaqaldar men ájelerdiń tárbıesiniń ultty qalyptastyrýdaǵy róline toqtaldy.
