OQO-da avtomobıl joldary kúrdeli jóndeýden ótýde
ShYMKENT. QazAqparat - Shymkent qalasynyń Saıram jáne Tóle bı aýdandary baǵytyndaǵy avtomobıl joldary kúrdeli jóndeýden ótýde. Oblys ákimi Janseıit Túımebaevtyń tapsyrmasy boıynsha bul jumystarǵa tıisti qarjy qaralyp, qurylys-jóndeý júrgizilip jatyr, dep habarlaıdy QazAqparat tilshisi.
Oblystyq jolaýshylar kóligi jáne avtomobıl joldary basqarmasynyń basshysy Nurlan Baıǵuttyń málimdeýinshe, joldardy jóndeý josparǵa sáıkes kezeń-kezeńimen júrgiziledi.
«Saıram-Qaramurt aralyǵyndaǵy avtomobıl jolyn jóndeýdiń jalpy quny 2039,0 mln teńgeni qurap, aǵymdaǵy jyly oblystyq bıýdjetten 750 mln teńge qaraldy. Josparǵa sáıkes atalǵan aýmaqtaǵy jol 2020 jylǵa deıin tolyq paıdalanýǵa beriletin bolady. Al Shymkent-Saıram-Kóksáıek jolyn jóndeýdiń jalpy quny 4128,3 mln teńgeni qurap, aǵymdaǵy jyly oblystyq bıýdjetten 700 mln teńgesi bólinedi. Josparǵa sáıkes, jol 2020 jylǵa deıin tolyq paıdalanýǵa berilmek. Jóndeý jumystaryna baılanysty oryn alǵan qolaısyzdyqtarǵa túsinistikpen qaraýlaryńyzdy suraımyz», - dedi Nurlan Marhabatuly.
Aıta keterligi, buǵan deıin Saıram-Qaramurt jáne Shymkent-Saıram-Kóksáıek avtomobıl joldarynyń tozyǵy jetip, jolaýshylarǵa qatynaý qıynǵa túsken. Sondaı-aq, «Ibragım ata», «Qarashash ana», «Mártóbe» syndy qasıetti oryndarǵa zııarat etýshiler men «Qasqasý» demalys oryndary, «Saıram-Ógem» qoryǵyna týrısterdiń kelýine kedergi bolyp keldi.
Qazirgi tańda qosymsha ishki joldar jáne basqa da ýaqytsha aınalma joldar arqyly kólik qozǵalysy múmkindiginshe retke keltirilgen. Aldaǵy jyldary atalǵan aralyqtaǵy avtomobıl joldary tolyq paıdalanýǵa beriletin bolady.
