OQO-da aýylǵa barǵan dárigerlerge 1 mıllıon teńgeden beriledi
ShYMKENT. QazAqparat - Ońtústik Qazaqstan oblysynda aýylǵa barǵan dárigerlerge 1 mıllıon teńgeden beriledi. Bul týraly búgin OQO Óńirlik kommýnıkatsııalar qyzmetinde ótken baspasóz máslıhatynda Densaýlyq saqtaý basqarmasynyń basshysy Muqan Egizbaev málim etti. Oblystyń bas dárigeriniń sózinshe oblys basshylyǵy jas mamandarǵa kóp jaǵdaı jasap, qarjy kólemin kóbeıtti, dep habarlaıdy QazAqparat tilshisi.
«Buǵan deıin aýyldy jerlerge barǵan dárigerlerge 100 myń teńgeden bir rettik kómek berilip keldi. Alaıda bul másele oblys ákimi Janseıit Qanseıitulynyń qoldaýymen qaıta qaralyp, oblystyq máslıhattyń sheshimimen beriletin qarjy kólemi ulǵaıtyldy. Aýyldy jerlerde dárigerler tapshylyǵyn tómendetý maqsatynda onda joldanatyn mamandardyń áleýmettiń kómek paketine ózgerister engizildi. 2018 jyldyń qańtar aıynan bastap aýyldyq jerge joldanatyn jas mamandar bir rettik 1 mıllıon teńge kómek alatyn bolady», - dedi Muqan Keńesbekuly.
Basqarma basshysynyń sózinshe, 1 mln teńge dárigerlerge Ońtústik Qazaqstan oblysynda ǵana beriledi. Biraq kelisim boıynsha aýyldy jerlerge jumysqa baratyn mamandarǵa bes jyl qyzmet etý mindetteledi. Buǵan deıin bul merzim úsh jyl bolatyn.
Sondaı-aq, oblystyń densaýlyq saqtaý salasynda keshendi medıtsınalyq aqparattyq júıe engizilýde. Bul maqsatta 8 582 kompıýterlik tehnıka satyp alynǵan. Jyl sońyna deıin oblystyń barlyq medıtsınalyq uıymdarynyń jumysy 100% kompıýterge kóshedi dep josparlanyp otyr. Biryńǵaı server medıtsınalyq uıymdaryn patsıent týraly elektrondyq aqparat almasý úshin baılanystyrady. «Jınaq aqparat avtomattandyrylǵan túrde jergilikti atqarýshy organdardaǵy sıtýatsııalyq ortalyqta túsedi. Qaǵaz túrindegi qujat aınalymy azaıady, bul óz kezeginde patsıentterdiń medıtsınalyq uıymdary arasynda bos júrýi edáýir qysqarady», - deıdi Muqan Egbizbaev. Osylaısha ońtústik turǵyndary elimizde alǵashqy bolyp elektrondyq densaýlyq pasporttaryn almaqshy.
