OQO-da aýyldastaryn atyp óltirgen úsh turǵyn sottaldy
ShYMKENT. QazAqparat - Ońtústik Qazaqstan oblysynda aýyldastaryn atyp óltirgen úsh turǵyn sottaldy. Oblystyq qylmystyq ister jónindegi aýdanaralyq soty ekeýin uzaq merzimge, úshinshisin 3 jylǵa bas bostandyǵynan aıyrdy, dep habarlaıdy QazAqparat tilshisi.
Atalǵan sottyń úılestirýshi- sýdıasy Ábınur Qarabaevtyń sózinshe, qylmystyq oqıǵa osy jyldyń qańtar aıynda Sozaq aýdanyndaǵy aýyldardyń birinde bolǵan. Sot barysynda marqumnyń buryn isti bolǵany, jazasyn ótep kelgen soń aýyldastaryn qınaǵany anyqtaldy. Atap aıtqanda, turǵyndardan aqsha jınap, tipti travmatıkalyq tapanshadan oq atqan kezderi bolǵan. Osyǵan shydamaǵan aýyldyń jigitteri aldyn ala jospar quryp, 1-shi qańtar kúni aýyldastaryn atyp óltirgen.
«Eki aıyptalýshy marqumdy qarýmen atqan. Olarǵa 15 jyl 3 aı merzimde bas bostandyǵynan aıyrý jazasy taǵaıyndaldy. Al, úshinshi aıyptalýshy qarý atýdan bas tartqany úshin jazasy jeńilirek boldy. Ol úsh jylǵa sottaldy»,-dedi Ábınur Qarabaev.
