OQO-da aýyl jastarynyń forýmy ótti
ShYMKENT. QazAqparat - Ońtústik Qazaqstan oblysy Saıram aýdanyndaǵy Qarabulaq aýylynda aýyl jastarynyń forýmy ótti. «Tárbıe otbasynan bastalady» taqyrybymen ótken jıynǵa 600-den astam jastar qatysty , dep habarlaıdy QazAqparat HAA tilshisi.
Oblystyq Qazaqstan halqy assambleıasynyń uıymdastyrǵan jıynda Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasyn nasıhattaý jáne túsindirý, sonymen birge ony júzege asyrý jáne qazirgi jahandyq ózgerister jaǵdaıyndaǵy qazaqstandyq patrıotızmdi qalyptastyrý máseleleri sóz boldy. Forýmdy ashyp, júrgizip otyrǵan Saıram aýdanynyń ákimi Baqtııar Mamaev óz sózinde Elbasynyń baǵdarlamalyq maqalasynda aıtylǵan maqsat-mindetterge toqtalyp, ony iske asyrýda jastarǵa artylar jaýapkershilik jaıyn sóz etti. Al oblystyq Qazaqstan halqy Assambleıasy tóraǵasynyń orynbasary Muratáli Qalmuratov eldiń birligi men yntymaǵyn saqtap, etnosaralyq tatýlyqty nyǵaıtýdyń mańyzdylyǵyna toqtaldy.
«Eldiń birligi, tatýlyǵy men tynyshtyǵynyń nátıjesinde búgingi tańdaǵy tabystarǵa jetip, eldigimizdi nyǵaıtyp kelemiz. Endeshe, el birligi keıingi býynǵa amanattar eń basty baılyǵymyz bolýy kerek. Ol úshin osynaý jalpy ulttyq qundylyqtar jaıly áńgime ár otbasyda, dastarhan basynda aıtylýy tıis», - dedi Muratáli Orazalyuly.
Forýmda sonymen qatar Qazaqstan ózbekteri «Dýstlık» qaýymdastyǵynyń tóraǵasy Ikromjan Hashımjanov pen oblystyq bilim men jumyspen qamtýdy úılestirý jáne áleýmettik baǵdarlamalar basqarmalarynyń, oblystyq din máselelerin zertteý ortalyǵy men jastar resýrstyq ortalyǵynyń basshylary sóz sóıledi. Erkin formatta ótken jıyn barysynda jastar din, jastar saıasaty, jumyspen qamtý, bilim salasyna qatysty ózderiniń kókeılerinde júrgen saýaldaryn qoıyp, sala mamandarynan tushymdy jaýaptar aldy. Qatysýshylar forým sońynda jastarǵa arnap ózara dostyq pen yntymaqty saqtaý, nyǵaıtý jóninde úndeý jarııalady.
