OQO-da aýyl turǵynynan aqsha bopsalaǵan polıtseı ustaldy
ShYMKENT. QazAqparat - Ońtústik Qazaqstan oblystyq ІІD qyzmetkerleri aýyl turǵynynan aqsha bopsalaǵan polıtseıdi ustady. Ol qylmystyq is qozǵamaý úshin 300 myń teńge alyp jatqan jerinen qolǵa túsken, dep habarlaıdy QazAqparat HAA tilshisi.
Polıtseıdiń alaıaqtyq áreketi Arys aýdany turǵynynyń aryzynan keıin áshkere boldy. Jergilikti turǵyn aryzynda aýdandyq ishki ister basqarmasynyń qyzmetkeri qazba baılyqtardy óz betinshe paıdalanǵany úshin qylmystyq jaýapkershilikke tartpaýǵa 300 myń teńge suraǵan. Osydan keıin ońaı jerden oljaly bolǵysy kelgen tártip saqshysyna qatysty jedel izdestirý sharalary júrgizilip, jedel ýákil aqsha alyp jatqan jerinen ustaldy. Qazirgi tańda 37 jastaǵy qyzmetkerdiń ústinen Qylmystyq kodekstiń 190 baby «Alaıaqtyqpen» is qozǵalyp, tergeý amaldary júrgizilýde. Tártip saqshysy qamaýǵa alynyp, odan jaýap alynyp jatyr.
Aıta keteıik, bıyl jyl basynan beri óńirde 8 ishki ister qyzmetkeri qamaýǵa alynǵan. Olardyń tórteýi Abaı aýdandyq polıtsııa bóliminiń ýchaskelik polıtseıleri bolsa, taǵy tórteýi Otyrar aýdandyq polıtsııa basqarmasynda basshylyq jáne jedel ýákil qyzmetterin atqarǵan. UQK qyzmetkerlerimen ustalǵandardyń barlyǵyna esirtki satýǵa qatysy bar degen aıyp taǵylýda.
