OQO-da aýyl sharýashylyǵy ǵalymdarynyń qatysýymen alqaly jıyn ótti

 ShYMKENT. QazAqparat  - Ońtústik Qazaqstan oblysynda aýyl sharýashylyǵy ǵalymdarynyń qatysýymen alqaly jıyn bolyp ótti.  Aımaq basshysy Janseıit Túımebaevtyń tóraǵalyǵymen ótken jıynda óńirdegi aýyl sharýashylyǵy salasynyń 2017-2021 jyldarǵa arnalǵan damý josparynyń  jaıy talqylandy, dep habarlaıdy  QazAqparat tilshisi.

Memleket basshysy kezekti Joldaýynda Qazaqstannyń agrarlyq sektoryn - ekonomıkanyń jańa draıverine aınaldyrý qajettigin atap ótti. Joldaýǵa sáıkes, aldaǵy 5 jylda agroónerkásip keshenindegi eńbek ónimdiligi jáne óńdelgen aýyl sharýashylyǵy ónimderiniń eksporty kem degende 2,5 ese artýy tıis bolatyn. Osyǵan oraı uıymdastyrylǵan jıynda oblys ákimi aýyl sharýashylyǵy óndirisindegi óńirdiń elimiz boıynsha alatyn úlesine toqtalyp, sala mamandaryna birqatar tapsyrmalar berdi.

  «Jalpy respýblıkalyq aýyl sharýashylyǵy óndirisinde oblysymyzdyń úlesi maqtadan - 100 paıyz, baqsha ónimderinen - 66 paıyz, júzimnen -  65 paıyz, maqsarydan - 40 paıyz, jemis-jıdekten - 31 paıyz, kókónisten - 24 paıyz kóleminde. Bul kórsetkishti odan ary arttyrý úshin qarqyndy tehnologııalar men ınnovatsııalyq jetistikterdi keńinen óndiriske engizý qajet. Sondyqtan ǵalymdarmen birlese zertteý jumystaryn keńinen júrgizip, álemdik talaptarǵa saı ónim óndirýge umtylǵan jón. Aldaǵy ýaqytta sharýalar ozyq ylǵal únemdeý tehnologııalaryn paıdalanyp, túsimdiligi joǵary, jańa sortty daqyldar egip, qarqyndy baý, jańǵaq, júzim men jemis-jıdek alqaptaryn ulǵaıtý kerek. Sondaı-aq, tek shıkizat kúıinde eksporttamaı, ónimdi qaıta óńdeý arqyly túrli ónim túrinde shyǵarǵanymyz durys», - dedi Janseıit Túımebaev.

Budan ózge, jıynda «J. Jıenbaev atyndaǵy Qazaq ósimdik qorǵaý jáne karantıni ǴZI» JShS-ń Bas dırektory, akademık Abaı Saǵıtov saladaǵy ónimdilikti arttyrýdaǵy jańa ǵylymı jetistikterge toqtalyp ótti. Al, oblystyq aýyl sharýashylyǵy basqarmasynyń basshysy Serik Turbekov atalǵan salanyń aımaqtaǵy  áleýeti jaıynda baıandama jasady. Sondaı-aq, aýdan ákimderi men sharýashylyq basshylary bul salada ónimdilikti arttyrýdaǵy qajettilikterin jetkizdi.

Sonymen qatar, basqosýda óńirdegi mal sharýashylyǵy salasyn kórkeıtý jaıy sóz boldy. Atap aıtqanda, "Aqyldy jaıylym" alqaptaryn kóbeıtý, aýyl, eldi mekenderdegi ortaq mal jaıylym qoryn tıimdi paıdalaný, ósimdik qaldyqtaryn mal azyqtyqqa jaramdy etý joldaryn qarastyrý, ónimdiligi joǵary asyl tuqymdy maldardy paıdalaný syndy usynystar aıtyldy.