OQO-da aýyl ákimi mas kúıinde qyzmettik kólikpen adam qaǵyp ketken
ShYMKENT. QazAqparat - Ońtústik Qazaqstan oblysy Ordabasy aýdanynda aýyl ákimi ishimdikke toıyp alyp, qyzmettik kólikpen adam qaǵyp ketken. Sodan soń oqıǵa ornynan izin sýytqan, dep habarlaıdy QazAqparat tilshisi.
Al jol kólik oqıǵasynan aýyr jaraqat alǵan Bórjar aýylynyń 47 jastaǵy turǵyny aýyr halde aýrýhanaǵa túsip, qazir jansaqtaý bóliminde jatyr. Keıinnen belgili bolǵandaı, adam qaǵyp qashyp ketken sol aýyldyń ákimi eken. Oblystyq ishki ister departamenti baspasóz qyzmetiniń jetekshisi Saltanat Qarakózovanyń sózinshe, jol kólik oqıǵasyn jasaǵan Bórjar aýyldyq okrýginiń ákimine qatysty qylmystyq is qozǵalǵan.
«Oqıǵa ornyna barǵan polıtsııa qyzmetkerleriniń anyqtaǵany VAZ-2107 qyzmettik avtokóliktiń júrgizýshisi adamdy qaǵyp, oqıǵa ornynan boı tasalaǵan. 2001 jylǵy kýágerdiń bergen deregi boıynsha kináli azamat anyqtaldy. Adam qaqqan kúdiktini polıtseıler úıinen ustady. Qazirgi tańda 1972 jyly týǵan avtokólik júrgizýshisine qatysty Qylmystyq kodekstiń 345-shi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby jáne 347-shi «Jol-kólik oqıǵasy bolǵan jerden ketip qalý» baby boıynsha is qozǵalyp, tergeý amaldary júrgizilýde. Tıisti saraptamalardyń qorytyndysy boıynsha onyń mas halde bolǵany rastalǵan. Jábirlenýshi azamattyń tiri qalýyna baılanysty ol qamaýǵa alynbaǵan», - dedi Saltanat Qarakózova.
Ordabasy aýdandyq ákimdiginiń málimetinshe, jol kólik oqıǵasyn jasaǵan ákim qazir densaýlyǵyna baılanysty demalysqa shyǵyp, aýrýhanada jatyr.
