OQO-da «Atameken-Ordabasy» ındýstrıaldy parki iske qosylady
Nátıjesinde «Atameken-Ordabasy» ındýstrıaldy parki qurylyp, kásipkerlerge birqatar tegin qyzmetter jıyntyǵyn usynǵaly otyr, dep habarlaıdy QazAqparat HAA tilshisi.
Qala syrtynda ornalasqan óndiris ornynda aýyl sharýashylyǵy men tamaq óndirisinen ózge barlyq salalar úshin qolaıly jaǵdaı jasalǵan. Onda taýarlarǵa arnalǵan qoıma da bar. Búginde parkte 5 joba iske asyrylyp jatyr. Indýstrıaldy parkin kórip qaıtqan oblys ákimi Janseıit Túımebaev zaýyttyń aýmaǵynda birqatar jańa kásiporyndar qurý maqsatynda óndiris nysandaryn kásipkerlerge eki aıǵa tegin berý isin qolǵa alyp, jeńildetilgen baǵa saıasatyn usynǵan jón ekenin aıtty. Tegin qyzmetter jıyntyǵyn túsindirý jumystaryn kúsheıtýdi tapsyrdy.
Al, óńirlik kásipkerler palatasynyń dırektory Asqar Ábýbákirovtiń sózinshe, ındýstrıaldy parki kásipkerlerge zańgerlik jáne býhgalterlik qyzmet kórsetip, olardy bıznes salasynda oqytýdy da qolǵa alady. Sondaı-aq, atalmysh mekemede kásip ashqysy keletinderge aqparattyq jáne PR qoldaý kórsetilip, jarnamalaý, qarjy kózin tartýǵa atsalysý, bıznes-jospar jasaý syndy tegin qyzmetter kórsetiledi.
Óńir basshysy munan soń Shymkenttegi qorǵasyn zaýytyna baryp, óndiris aýmaǵynyń búgingi jaǵdaıymen tanysty. Kezinde alpaýyt óndiris orny bolǵan zaýyttyń tsehtary búginde jumys istemeı turǵanyn kórip, óz pikirin bildirdi.
«Qorǵasyn zaýytynyń bolashaǵy túsiniksiz. Sondyqtan aldaǵy ýaqytta eki zaýytty da tıimdi paıdalanýdyń tetikterin oılastyrǵan jón. Eger múmkin bolyp jatsa, ondaǵy jer telimderi men óndiris oshaqtarynda jańa óndiris oryndaryn ashýdy qolǵa alýymyz kerek», - dedi Janseıit Qanseıituly.
Aıta keteıik, 2010 jyldary «Ońtústikpolımetall ÓK» aktsıonerlik qoǵamy men «Qazaqmys» korporatsııasy jáne «A-Mega treıdıng» JShS-niń úshjaqty kelisimi negizinde qorǵasyn zaýyty tolyqqandy jumysqa kóshken bolatyn. Alaıda, ónerkásip ornynyń jumysy qaıta turalap, bankrotqa ushyrady. Búginde zaýyttyń birqatar ǵımarattary bankte kepildikte tur.
