OQO-da Astana kúni qarsańynda 20 nysan paıdalanýǵa beriledi

ShYMKENT. QazAqparat - Ońtústik Qazaqstan oblysynda «Astananyń 20 jyldyǵyna - 20 nysan» aktsııasy bastaldy. Atalǵan mereke qarsańynda oblysta áleýmettik jáne kásiporyn syndy 20 nysan ashylyp, el ıgiligine beriledi, dep habarlaıdy QazAqparat oblys ákiminiń baspasóz qyzmetine silteme jasap.

Aktsııa aıasynda Shymkent qalasyndaǵy «Ońtústik» ındýstrıaldy aımaǵynda ornalasqan «Shymkent Temir» JShS-nyń bolat quıý zaýyty iske qosylady. Jalpy quny 4,2 mlrd teńge bolatyn kásiporyn jylyna 240 myń tonna ónim shyǵarady. Óndiris orny iske qosylǵanda 150 azamat jumyspen qamtylmaq.

Sonymen qatar, Shymkentte ulttyq tennıs ortalyǵy, zoobaqtyń «Safarı» bóligi men Astana dańǵylynyń boıynda gúlzardyń ashylý rásimi ótedi. Budan basqa mereıtoı qarsańynda el ıgiligi úshin oblys aýmaǵynda 4 balabaqsha, Shardara aýdanynda 10 páterli eki qyzmettik turǵyn úı men Tóle bı aýdanynda 20 páterli bes qabatty turǵyn úı, al Báıdibek aýdanynda 1 páterli 20 kommýnaldyq turǵyn úı qurylysy paıdalanýǵa beriledi.

1-6 shilde aralyǵynda Túrkistan qalasynda «ıAssy qus» sharýa qojalyǵynyń ekinshi kezeńi, syıymdylyǵy 200 tonna bolatyn kókónis jáne jemis-jıdek saqtaıtyn servıstik ortalyq ashylady.

Astana qalasynyń 20 jyldyǵyna 20 nysan aktsııasy barysynda 200 oryndyq mádenıet úıi men 600 oryndyq mektep, 60 balaǵa shaqtalǵan «Aqken» emdeý-saýyqtyrý lageri jáne sport nysandary men demalys oryndar el ıgiligine tapsyrlady.