OQO-da Assambleıa keńesiniń kezekti otyrysy ótti
Keńes otyrysynda Elbasy Nursultan Nazarbaevtyń elimizdiń saıası, ekonomıkalyq jáne rýhanı jańǵyrýy boıynsha alǵa qoıǵan mindetterin iske asyrýda Assambleıa aldynda turǵan mindetter qaraldy.
«Oblystyq Assambleıa músheleri men barlyq qurylymdary saıası, ekonomıkalyq jáne rýhanı jańǵyrý mindetin iske asyrýǵa belsene atsalysýǵa tıis. Eldiń birligi men qoǵamdyq kelisimdi saqtaý baǵytyndaǵy jumysymyzdy odan ári shırata túsýimiz kerek. Óıtkeni, alǵa qoıǵan maqsattar tynyshtyq, saıası turaqtylyq bolǵan jerde ǵana júzege asatyny sózsiz. Ony árbir etnos ókili uǵynýy qajet, - dep atap ótti jıyndy ashqan oblystyq Qazaqstan halqy Assambleıasy tóraǵasynyń orynbasary Muratáli Qalmuratov.
Otyrys barysynda memlekettik tildi latyn grafıkasyna kóshirýdiń mańyzy jóninde OQO Qazaqstan halqy Assambleıasy janyndaǵy ǵylymı-sarapshylyq toptyń jetekshisi, professor Asma Qalybekovanyń, Qazaqstan ózbekteriniń «Dýstlık» qoǵamdyq birlestikteri qaýymdastyǵynyń tóraǵasy Ikram Hashımjanovtyń habarlamalary tyńdaldy. Sonymen qatar, Rýhanı kelisim kúnine oraı qazaqstandyq biregeılik pen birlikti nyǵaıtýdyń mańyzy jóninde Qazaqstan musylmandar dinı basqarmasy ókil ımamynyń orynbasary Muhamedjan Estemirov, Svıato-Nıklskıı kafedraldyq soborynyń dinı qyzmetshisi Aleksandyr Mogılevskı jáne oblystyq «Din máselelerin zertteý ortalyǵy» KMM dırektorynyń orynbasary Mádı Besbaev óz oılaryn ortaǵa saldy.
Jıynda oblystyq Qazaqstan halqy Assambleıasy Keńesine jańa músheler qabyldanyp, qazaqstandyq birlik pen biregeılikti nyǵaıtý maqsatynda jyl sońyna deıin ótetin aýqymdy is-sharalarǵa daıyndyq jumystary pysyqtaldy.
