OQO-da Arys qalasynyń bozbalalary ásker qataryna attandy

ShYMKENT. QazAqparat - Qazaqstan Respýblıkasy Táýelsizdiginiń 25 jyldyǵy mereıtoıyna oraı Arys qalalyq ishki saıasat jáne qalalyq qorǵanys isteri jónindegi biriktirilgen bóliminiń uıymdastyrýymen mádenıet úıinde Táýelsizdiktiń basty tuǵyryna aınalǵan Qazaqstan Qarýly Kúshteriniń sapynda áskerı boryshyn óteýdi abyroı sanaıtyn bolashaq jaýyngerlerdi ásker qataryna shyǵaryp salý saltanatty is-sharasy ótti, dep habarlaıdy oblys ákiminiń baspasóz qyzmeti.

«Ýaqyt almasady, urpaqtar ózgeredi, biraq Otanǵa degen súıispenshilik, qajyrlylyq, erlik, jaýyngerlik rýhymyz ózgerissiz qalady. Ata-babalarymyz Altaıdan Atyraýǵa deıingi ushqan qustyń qanaty, shapqan tulpardyń tuıaǵy talatyn ulan baıtaq jerdi aq naızanyń ushymen, aq bilektiń kúshimen syrtqy jaýlardan qorǵap, bizge amanattap qaldyrdy. Otandy qorǵaý  qasterli is. Qurmetti bolashaq jaýyngerler Otan aldyndaǵy boryshtaryńyzdy abroımen atqaryp, Qazaqstan halqynyń ıgiligi men beıbitshilikti qorǵaýǵa laıyqty úles qosyńyzdar» - dedi saltanatty sharada sóz alǵan Arys qalasynyń ishki saıasat bóliminiń basshysy Aıbol Álibek

Jıynda Uly Otan soǵysynyń ardageri M.Tretıakov, qalalyq ardagerler keńesiniń tóraǵasy B.Islambekov, «Otan» Aýǵanstan soǵysy ardagerleriniń» tóraǵasy S.Arynov, qalanyń bas ımamy A.Abdýlkárim, qalalyq qorǵanys isteri jónindegi biriktirilgen bóliminiń bastyǵy E.Bilálov, №44859 áskerı bólim komandıriniń orynbasary M.Málikovter jas sarbazdarǵa jaýyngerlik antqa adal bolyp, abroımen junuıalaryna oralýyna tilektestikterin bildirdi. Saltanatty jıynnyń sońy J.Baıǵuttıeva atyndaǵy óner mektebi ónerpazdarynyń patrıottyq án keshine jalǵasty.