OQO-da árbir tórtinshi memlekettik mekeme túrli zańbuzýshylyqtarǵa jol bergen
ShYMKENT. QazAqparat - Ońtústik Qazaqstan oblysynda árbir tórtinshi memlekettik mekeme túrli zańbuzýshylyqtarǵa jol bergen. Bul týraly óńirde júrgizilgen aýdıtorlyq tekserýdiń qortyndysynda málim boldy, dep habarlaıdy QazAqparat.
Oblystyq ishki memlekettik aýdıt departamenti basshylyǵynyń málimetterine qaraǵanda, mekemeler negizinen qarjylyq jáne qujattardy rásimdeý baǵytynda kemshilikter jiberip, 35 mlrd teńgege shyǵyn keltirgen.
Dese de aýdıtorlar naqty qaı mekemelerde kemshilikter anyqtalǵany jóninde ashyp aıtpady. Belgilisi, jyl basynan bergi júrgizilgen 223 mekemede tekserýdiń 179-ynda zańbuzýshylyqtar anyqtalǵan. Endi sheneýnikterden 1 mlrd 200 mıllıon teńgeniń qalaı shyǵyndalǵany jóninde jaýap alynatyn boldy.
«34 mlrd teńge - bul negizinen bıýdjettik qyzmetkerler tarapynan jiberiletin rásimdik kemshilikter bolyp sanalady. Bıýdjettik zańnamany buzý boıynsha 26 mlrd jáne memlekettik satyp alý boıynsha 7 mlrd teńgeniń zańbuzýshylyqtary anyqtaldy»,- dedi oblystyq ishki memlekettik aýdıt departamentiniń qyzmetkeri Damıra Mambekova.
Osy zańbuzýshylyqtar boıynsha 35 memlekettik qyzmetkerge 7 mln 600 myń teńge aıyppul salynǵan.
