OQO-da arabtar eki qus fabrıkasyn salady
Daıyn ónim ishki naryqty qamtyp qana qoımaı eksportqa shyǵarylady. Búginde Túlkibas aýdanyndaǵy bes aýyldyq okrýg aýmaǵynan qurylysqa qajetti 200 gektar jer bólingen. Sala mamandarynyń sózinshe aýqymdy joba eki kezeńmen júzege asyralady. Qus fabrıkasynda etti, taýyq balapanyn ınkýbatsııalyq jolmen kóbeıtýden bastap, odan daıyn shujyq ónimderine deıin óńdeıtin tsehtar salynady. Sondaı-aq qustarǵa qajetti jem-shópti de ózderi daıyndaıdy. Al, 2018 jyly alǵashqy otandyq ónim naryqqa shyǵady dep kútilýde. Qazaq-Arab birlesken kásiporny et óndirisi men óńdeýdi damytýǵa baǵyttalǵan strategııalyq ınvestıtsııalyq jobanyń biri bolmaq.
«Bir joba boıynsha 11 mlrd teńge, ekinshisine 18 mlrd teńgeden astam qarjy qarastyrylyp otyr. Qos qus fabrıkasy ashylǵanda jergilikti halyqqa 2 myńǵa jýyq jumys oryndary ashylady. Munyń ózi halyqtyń áleýetin kóterip, turmysyn jaqsartatyny sózsiz», - deıdi Túlkibas aýdandyq kásipkerlik bóliminiń sektor meńgerýshisi Bekaıdar Qurmanalıev.
Budan bólek, taýly aýdandaǵy ındýstrıaldy aımaqta et jáne sút, tabıǵı sýsyn shyǵaratyn, aýylsharýashylyq ónimderin qaıta óndeıtin 6 jobanyń qurylysy qolǵa alynyp otyr. Bul jobalardy júzege asyrýǵa 3 mlrd teńgege jýyq qarajat jumsalmaqshy.