OQO-da anasynan soqqy jegen 7 jasar bala jansaqtaý bóliminde jatyr
ShYMKENT. QazAqparat - Ońtústik Qazaqstan oblysynda aýyr jaraqat alǵan 7 jasar bala aýrýhanaǵa tústi.
Ordabasy aýdany Bógen aýylynan jetkizilgen jetkinshekti týǵan anasy sabap tastaǵan degen kúdik bar. Qazir óńirdiń tártip saqshylary tergeý sharalaryn bastap ketti, dep habarlaıdy QazAqparat HAA tilshisi.
Ábden soqqyǵa jyǵylǵan balany týystary Ordabasy aýdandyq aýrýhanasyna jetkizgen. Onda jaraqattardyń sebebin balanyń qulap qalǵanymen túsindirgen. Alaıda jaraqattaryn qarap shyqqan dárigerler jetkinshekti uryp soqqan degen qorytyndyǵa keledi. Sóıtip polıtsııany shaqyrtady.
«Bizge Ordabasy aýdandyq aýrýhanasynan 7 jasar balanyń aýyr halde túskeni týraly habarlama kelip tústi. Osy derek boıynsha jedel túrde tergeý toby barǵan bolatyn.Olar osy oqıǵaǵa baılanysty Qylmystyq kodekstiń 107-baby «Densaýlyqqa qasaqana aýyrlyǵy ortasha zııan keltirý» boıynsha qylmystyq is qozǵady. Sotqa deıin tergeý bastalyp ketti. Balaǵa qatysty birqatar sot-medıtsınalyq saraptamalar taǵaıyndaldy. Kúdikti retinde balanyń 31 jastaǵy anasy anyqtalyp otyr. Ol áli qamaýǵa alynǵan joq. Sot saraptamasynyń qorytyndysy boıynsha naqty protsessýaldyq sheshim qabyldanady»,- deıdi oblystyq ІІD baspasóz qyzmetiniń jetekshisi Saltanat Qarakózova.
Jaǵdaıy tym aýyr bolǵan soń jetkinshek oblystyq balalar aýrýhanasyna jetkizildi.
«Balanyń qazirgi jaǵdaıy birqalypty aýyr kúıinde qalyp otyr. Negizinen bas-mı jaraqatyn alǵan, 1-2 dárejeli kúıik shalǵan. Qazir jansaqtaý bóliminde. Birneshe ota jasaldy. Áli esine kelmedi. Atyn da bilmeıdi»,- deıdi oblystyq balalar aýrýhanasy bas dárigeriniń orynbasary Bolat Nusqabaev.
Dárigerler sondaı-aq jetkinshekti birde-bir adam izdep kelmegenin aıtady. Tipti týǵan anasy da jaǵdaıyn bilmegen.
