OQO-da anasy ólimshi etip sabaǵan 7 jasar bala balalar úıine ornalastyrylýy múmkin
ShYMKENT. QazAqparat - Ońtústik Qazaqstan oblysynda anasy ólimshi etip sabaǵan 7 jasar bala balalar úıine ornalastyrylýy múmkin. Qazir óńirdiń bilim salasy qyzmetkerleri óz balasyna qol jumsaǵan áıeldi analyq quqyǵynan aıyrý úshin tiısti qujattar rásimdeýde, dep habarlaıdy QazAqparat HAA tilshisi.
Ordabasy aýdandyq bilim bóliminiń basshysy Maıhan Naqypovtyń sózine qaraǵanda, qazir aýdandyq kámeletke tolmaǵandar men jasóspirimder jónindegi komıssııaǵa anasynan jábir kórgen Asyl Battalǵazıevty balalar úıine ornalastyrý jóninde usynys berilipti.
«Asyl oblystyq balalar aýrýhanasynan jazylyp shyqqan kúni dárigerler bizge arnaıy hatpen shyǵady. Qazirgi kezde biz anasyn analyq quqynan aıyrý jóninde aýdandyq komıssııaǵa usynys berip qoıdyq. Sosyn barlyq qujattardy rásimdep bolǵan soń, materıaldardy sotqa ótkizemiz. Bala aýrýhanadan shyqqan jaǵdaıda ýaqytsha beıimdeý ortalyǵynda bolady. Keıinnen anasyn ata-analyq quqynan aıyrý protsesi ótkennen soń biz balany balalar úıine ornalastyramyz», - deıdi M. Naqypov.
Ázirge jeti jasar Asyl oblystyq balalar aýrýhanasynda em qabyldaýda. Dárigerler onyń jaǵdaıy túzelip keletinin aıtady. Dese de sala mamandary naýqas jetkinshekti aýrýhanaǵa túskenge deıin múgedek bolyp qalǵan dep otyr. Bir aıaǵy men bir kóziniń aqaýy men oı-órisi jaqsy damymaı, tiliniń kemistigi bolǵan deıdi.
«Balanyń naýqastary men múgedektigi bizge kelgenge deıin bolǵan. Al, anasynyń soqqysy onyń aýrýyn asqyndyryp jibergen. Alaıda qazirgi kezde onyń beti beri qarap, jaǵdaıy túzelip keledi. Biraq az ýaqyt aralyǵynda ony tolyqtaı emdelip ketedi dep aıtý qıyn. Balaǵa jyldar boıy emdelýge týra keledi», - deıdi oblystyq balalar aýrýhanasy bas dárigeriniń orynbasary Bolat Nusqabaev.
Eske salaıyq, ótken aıda Ordabasy aýdanynda 7 jasar balanyń es-tússiz, aýyr halde aýrýhanaǵa túskeni málim bolǵan . Ol kezde óńirdiń tártip saqshylary jetkinshekti týǵan anasy sabap tastaǵan degen kúdik bar ekenin aıtqan edi. Keıinnen osy oqıǵaǵa baılanysty Qylmystyq kodekstiń 107-baby «Densaýlyqqa qasaqana aýyrlyǵy ortasha zııan keltirý» baby boıynsha qylmystyq is qozǵaldy. Balaǵa qatysty birqatar sot-medıtsınalyq saraptamalar taǵaıyndaldy. Qazirgi tańda kúdikti retinde anyqtalǵan balanyń 26 jastaǵy anasyna qatysty tergeý amaldary júrgizilýde.
