OQO-da anasy múgedek etken bala qorǵanshylyq qyzmetkeriniń úıinde turyp jatyr
ShYMKENT. QazAqparat - Ońtústik Qazaqstan oblysynda anasy ólimshi etip sabaǵan 7 jasar bala aýrýhanadan shyǵaryldy. Asyl Battalǵazıev bes kúnnen beri Ordabasy aýdandyq bilim bóliminiń qorǵanshylyq, qamqorshylyq bóliminiń ádiskeri Erkinaı Jamalovanyń úıinde turyp jatyr, dep habarlaıdy QazAqparat HAA tilshisi.
Ordabasy aýdandyq bilim bóliminiń ádiskeri múgedek bolyp qalǵan balanyń úıinde zań aıasynda ýaqytsha turyp jatqanyn aıtady. Ábden psıhologııalyq turǵyda zardap shekken jetkinshek onsyzda úsh aıdan beri aýrýhanada jatqan. Endi balaǵa otbasy jylýy qajet deıdi maman. Qazir jeti jastaǵy Asyl ózge balalarmen oınap, qalypty jaǵdaıǵa kele bastapty.
«Asyl úıde balalarmen oınap, ózin erkin sezinip júr. Ol úsh-tórt aıdan beri aýrýhanada jatqannan keıin biz ony úıdegi meıirimdi sezinsin, balalarmen aralassyn dep oıladyq. Onyń ústine qujattary da áli tolyq rásimdelip bitken joq. Zańda da balany ýaqytsha januıalyq meırim alýy úshin otbasyda turýy qarastyrylǵan eken. Sol zań aıasynda men aýdandyq bilim bóliminiń basshysyna tilhat berip, úıge alyp kelip otyrmyn. Jalpy qazirgi jaǵdaıy, tamaq ishýi, uıqysy jaqsy. Biraq balanyń aqyl esi óz deńgeıinen sál tómendeý. Bir jerde turaqty oınaı almaıdy, árnársege júgire beredi. Balaǵa áli psıhologııalyq turǵyda jumys jasaý kerek, tárbıe berý qajet», - deıdi Erkinaı Jamalova.
Qazir pedagogıka salasynda 30 jyldyq eńbek ótili bar maman balany birtindep ortaǵa úıretip jatyr. Ózge balalarmen oınaýǵa, taqpaq aıtýǵa beıimdeýde eken.
«Asyl jaqsy sóıleı almaıdy, tili jaqsy damymaǵan. Tolyqqandy meıirim da qajet. Qazir men oǵan taqpaq úıretemin. Ol sol taqpaqtardy aıtyp, umtylýǵa tyrysady. Talpynysy bar. Onyń ómir súrýge degen qulshynysy keremet. Nemerelerimmen oınaǵan kezde jaı sóıleıdi. Men oǵan aıtamyn aıqaılap, erkin sóıle dep. Solaı erkindikke úıretip jatyrmyn. Qazir qujattar rásimdelip jatyr. Oǵan 15 kúndeı ketedi. Eger úıdegi balalarym baýyr basyp jatsa, ózim Asyldy qamqorlyǵyma alýym múmkin», - deıdi bilim bóliminiń ádiskeri.
Erkinaı Jamalovanyń aıtýynsha bala óz anasyn kóp esine ala bermeıdi. Tek keı kezderi úıine barǵysy keletinin aıtatyn kórinedi. Endigi kezekte jetkinshektiń múgedektigin anyqtaý úshin arnaıy qyrkúıek aıynda arnaıy medıtsınalyq tekserýden ótedi. Sebebi, anasynan taıaq jep, denesin kúıik shalǵan Asyl Battalǵazıev búginde múgedek bolyp qalǵany belgili. Ol sońǵy aılarda aýrýhanada em qabyldap, endi ǵana ózine kele bastady.
Eske salaıyq, osy jyldyń mamyr aıynda Ordabasy aýdanynda 7 jasar balanyń es-tússiz, aýyr halde aýrýhanaǵa túskeni málim bolǵan. Ol kezde óńirdiń tártip saqshylary jetkinshekti týǵan anasy sabap tastaǵany anyqtalǵan bolatyn. Keıinnen jetkinshektiń sheshesine qatysty Qylmystyq kodekstiń 107-baby «Densaýlyqqa qasaqana aýyrlyǵy ortasha zııan keltirý» baby boıynsha is qozǵalyp, birqatar sot-medıtsınalyq saraptamalar taǵaıyndaldy. Qazirgi 26 jastaǵy kelinshekke qatysty tergeý amaldary júrgizilýde. Bezbúırek áıel sondaı-aq týǵan balasynan resmı túrde bas tartyp, qolhat bergen bolatyn. Osydan keıin sot sheshesin analyq quqynan aıyrdy.
