OQO-da ana ólimi eki esege azaıdy
ASTANA. QazAqparat - OQO-da ana ólimi eki esege azaıdy. Bul týraly óńirlik kommýnıkatsııalar qyzmetinde ótken baspasóz máslıhatynda Densaýlyq saqtaý basqarmasynyń basshysy Muqan Egizbaev habarlady. Onyń aıtýynsha, respýblıkalyq kórsetkishten tómen mundaı jetistikke oblysta tuńǵysh ret qol jetkizildi.
«Oblysta analar jáne náresteler ólim-jitimin tómendetý maqsatynda júıeli sharalar qoldanylyp, balalar men bosanatyn áıelderge járdem berý qyzmetinde medıtsınalyq kómek kórsetýdiń biriktirilgen úlgisi tabysty endirildi. Qoldanylyp jatqan sharalar nátıjesinde sońǵy birneshe jyl ishinde kórsetkishterdiń turaqty tómendeýine qol jetkizildi. Statıstıka komıtetiniń málimetteri boıynsha oblysta ana ólim-jitiminiń kórsetkishi aǵymdaǵy jyldyń 8 aıynda 41,7% azaıyp, alǵash ret respýblıkalyq kórsetkishten tómen boldy. Aǵymdaǵy jylǵy 9 aıynyń aldyn ala málimetteri boıynsha ana ólim-jitim kórsetkishi 2 esege tómendedi», - dedi M.Egizbaev.
Spıkerdiń sózinshe, Ońtústik Qazaqstan oblysynda «Jol kartasy» sheńberinde 2017 jylǵy 9 aıynyń qorytyndysymen, densaýlyq saqtaý júıesiniń negizgi ındıkatorlaryna qol jetkizildi. Oblysta 5 negizgi áleýmettik máni bar juqpaly emes aýrýlar - jiti mıokard ınfarkti, mı qanaınalymynyń jiti buzylysy (ınsýlt), qaterli isikter, jaraqattar, ana men bala densaýlyǵyn qorǵaý qyzmeti boıynsha aýrýshańdyq jáne ólim-jitim kórsetkishteri respýblıkalyq kórsetkishterden tómen.
Ońtústik Qazaqstan oblysynyń turǵyndaryna 104 medıtsınalyq uıym kómek kórsetedi. Onyń 38-i emhanalyq jáne 49-y aýrýhanalyq mekeme. Olarda 7950 dáriger, 24874 orta býyn medıtsınalyq qyzmetker jumys isteıdi.
