OQO-da ana men bala ólimi azaıyp keledi
ShYMKENT. QazAqparat - Ońtústik Qazaqstan oblysynda nárestelerdiń ólim-jitim kórsetkishi ótken jyly 3,4 paıyzǵa tómendegen. Al, ana ólimi 34,1 paıyzǵa azaıyp, respýblıkada 5-orynǵa turaqtady, dep habarlaıdy QazAqparat tilshisi.
Oblystyq densaýlyq saqtaý basqarmasynyń basshysy Muqan Egizbaevtyń sózinshe, ótken jyly óńirde bıýdjet esebinen 33 emdeý mekemesi salynǵan. Atap aıtqanda, Shymkent qalalyq jedel járdem kórsetý aýrýhanasy men oblystyq onkologııalyq dıspanseriniń korpýsy, aýdandyq emhana men 7 dárigerlik ambýlatorııa boı kótergen. Sondaı-aq 18 feldsherlik-akýsherlik jáne 5 medıtsınalyq pýnkt paıdalanýǵa berildi. Budan bólek qurastyrylmaly-qańqaly modýldik konstrýktsııa ádisimen salynǵan 20 medıtsınalyq tirek satyp alyndy.
«2017 jyly 4 emhananyń qurylysy bastalyp, búginde jumys júrgizilýde. Olardyń qatarynda úsh birdeı 500 adamdyq Aqsýkent, Jetisaı jáne Kentaý qalalyq emhanalarynyń qurylysy, sonymen qatar, 250 naýqasqa shaqtalǵan Maqtaral aýdandyq Myrzakent emhanasyn aıtýǵa bolady. Memlekettik-jekemenshik áriptestik aıasynda Shymkent qalasynda №10 Qaıtpas emhanasynyń qurylysy bastalyp, Birkólik, Aqsý-Jabaǵyly sanatorııleri senimgerlik basqarýǵa berildi», - dedi Muqan Keńesbekuly.
Basqarma basshynyń aıtýynsha, kezeksiz emhanany jetildirý maqsatynda 23 medıtsınalyq uıymǵa elektrondyq kezek tablosy ornatylǵan. Bul júıemen 2018 jyly óńirdegi barlyq emhanalar qamtamasyz etiletin bolady. Shuǵyl áreket etý maqsatynda SOS júıeleri 17 medıtsınalyq uıymǵa engizildi. Bul baǵdarlama patsıenttiń, posttaǵy meıirbıkeniń, kezekshi dárigerdiń qajetti mamandy 1 mınýt ishinde shuǵyl shaqyryp alýyna múmkindik beredi.
Sonymen qatar, 35 medıtsınalyq uıym keshendi aqparattyq júıege qosylǵan. Aldaǵy ýaqytta óńirde emhana, aýrýhana jáne jedel medıtsınalyq kómek qyzmetiniń biriktirilgen aqparattyq júıesi engizilip, biryńǵaı sıtýatsııalyq ortalyq ashylady dep josparlanyp otyr.
