OQO-da alǵash ret jastar arasynda jaǵajaı sportynan jarystar ótti
ShYMKENT. QazAqparat - Ońtústik Qazaqstan oblysynyń Shardara sý qoımasynda jaǵajaı sportynan «Ońtústik Qazaqstan oblysy ákiminiń Kýbogy» úshin jarys ótti. «Buqaralyq sport - jastar úshin» taqyrybynda uıymdastyrylǵan saıysqa ár aýdannan komandalar qatysty, dep habarlaıdy QazAqparat HAA tilshisi.
Aımaqta alǵash ret ótkizilgen sharany oblystyq jastar saıasaty máseleleri jónindegi, oblystyq dene shynyqtyrý jáne sport basqarmasy men Shardara aýdany ákimdigi uıymdastyrdy. Stýdent jastar arasyndaǵy oıyndar negizinen, sporttyń jaǵajaı voleıboly, shaǵyn fýtbol jáne arqan tartý túrleri boıynsha órbidi. Keshke deıin jalǵasqan saıys qyzyqty da tartysty ótti. Sporttyq jarystardan bólek, teńiz jaǵasynda shomylǵan jastar qumnan qalashyqtar salyp, «EKSPO - 2017», «Báıterek» nysandaryn beıneledi.
Júlde qory 1 mln teńgeni quraıtyn sporttyq oıyndardyń jeńimpazdary arnaıy syı-syıapattarymen marapattaldy.
Atap aıtqanda, shaǵyn fýtbol boıynsha ІІІ oryn Qazyǵurt aýdanyna berilip, arnaıy dıplomdarmen qatar 25 myń teńge qarjylaı syılyq tartý etildi. ІІ oryn kentaýlyqtarǵa buıyryp, olar 50 myń teńgeni ıelendi. І oryndy jeńip alǵan Maqtaaral aýdanyna 70 myń teńge syıǵa tartyldy, bas júldege ıegeri - Shardara aýdanynyń komandasy 100 myń teńge qarjylaı syılyq aldy. Sol sııaqty, arqan tartý oıynynda ІІІ oryndy Túlkibas, ІІ oryndy Qazyǵurt, І oryndy Maqtaaral, bas júldeni Shardara aýdany jeńip aldy. Jaǵajaı voleıbolynda ІІІ oryndy Sozaq aýdany, ІІ oryndy Shymkent qalasy, І oryndy Kentaý qalasy, bas júldeni Shardara aýdany ıelendi. Jeńimpaz komandalarǵa qarjylaı syılyqtar tabys etildi.
