OQO-da alǵash ret jas otbasylar mektebi ashyldy
ShYMKENT. QazAqparat - Ońtústik Qazaqstan oblysynda alǵash ret «Shańyraq» jas otbasylar mektebi ashyldy. Oblystyq «Jastar resýrstyq ortalyǵynyń» janynan ashylǵan mektep jastarǵa ǵana emes, jas otbasylar men bolashaq kelinderge, otbasyn qurýdy nıet etken jigitterge de keńes berip, qyzmet kórsetpek, dep habarlaıdy QazAqparat HAA tilshisi.
Ortalyqtyń ashylý saltanatyna jazýshy, qazaqy salt-dástúrlerimizdi nasıhattaýshy Zeınep Ahmetova qatysyp, jas otbasylar mektebiniń aldaǵy jumysyna sáttilik tiledi. Onda kelgen jas kelinderdiń búldirshinderiniń tusaýyn kesti.
Jalpy «Shańyraq» jas otbasylar mektebi pılottyq jobasy jas jubaılardyń sanasyna otbasylyq qundylyqtardyń mańyzdylyǵyn sińirý men januıanyń beriktigin saqtaý maqsatynda ashylyp otyr. Sondaı-aq munda jas otbasylardyń belsendi áleýmettik ustanymyn qalyptastyryp, quqyqtyq jáne medıtsınalyq saýattylyǵyn arttyrý kózdelýde.
Búginde elimizdegi ajyrasyp jatqan árbir tórtinshi otbasynyń osy ońtústik óńirinde bolýyna baılanysty ortalyqta bul problemaǵa taldaý jasalyp, ony boldyrmaý sharalary qolǵa alynbaq.
Sala mamandarynyń sózinshe, mekteptiń jumys isteý júıesi birneshe qadamnan turady. Aldymen, otbasyn qurýǵa sóz baılasqan 29 jasqa deıingi jup «Neke saraıyna» nekege turý týraly ótinim beredi. Onda AHAJ bólimi jas otbasylar mektebiniń 32 saǵattyq oqytý kýrsynan ótýge joldama berip, jastar psıhologııalyq, zańgerlik, medıtsınalyq keńester men salt-dástúr, ádet-ǵuryptarymyzǵa qanyǵyp, aspazdyq (qyzdar) jáne qolóner sheberligine (erler), sondaı-aq, bıge qatysady.
Munan bólek, taqyryptyq trenıngter men sheberlik sabaqtarynan ótken jupqa arnaıy sertıfıkattar tabystalyp, «Neke saraıynan» neke týraly kýálikpen qosa, arnaıy Love story fotosessııalary men otbasy baqyty týraly kitaptar, kórkemfılmder syıǵa tartylady.
Nátıjesinde, jas otbasylar mektebinen ótken jubaılar úılesimdi januıa bolýǵa, otbasynda kezdesetin kúızelisterge tótep berýge, quqyqtyq jáne medıtsınalyq turǵydan saýattylyǵyn jetildirýge, bolashaqta ata-ana men bala arasyndaǵy qarym-qatynasty nyǵaıtýǵa beıimdeledi degen boljam bar. Al kórsetiletin qyzmetterdiń barlyǵy tegin bolady.
