OQO-da alǵash ret «Ontustik Tourism. Invest 2017» atty forým ótedi
ShYMKENT. QazAqparat - Oblys ortalyǵy Shymkent qalasynda 14-16 qarashasy aralyǵynda «Ontustik Tourism. Invest 2017» atty halyqaralyq týrıstik, ınvestıtsııalyq forým ótedi, dep habarlaıdy QazAqparat oblys ákiminiń baspasóz qyzmetine silteme jasap.
Basqosý «Qazaqstan aýmaǵyndaǵy Uly Jibek joly boıynsha saıahat» festıvali sheńberinde uıymdastyrylyp otyr. Bul týraly OQO óńirlik kommýnıkatsııalar qyzmetinde ótken brıfıngte oblystyq kásipkerlik, ındýstrııaldy-ınnovatsııalyq damý jáne týrızm basqarmasynyń basshysy Batyrhan Qurmanseıit málim etti.
Basqarma basshysynyń aıtýynsha, atalǵan festıval Almaty qalasynda bastaý alyp, Jambyl oblysynda jalǵasyn taýyp otyr. Odan keıin Ońtústik Qazaqstan oblysynda aıaqtalatyn bolady. Forýmnyń negizgi maqsaty - óńirimizdegi týrıstik salanyń damýyndaǵy ózekti máseleler týraly pikir almasý, sondaı-aq, Ońtústik Qazaqstan oblysynyń ınvestıtsııalyq múmkindikterin tanystyrý, ınvestıtsııa tartýǵa qolaıly jaǵdaı jasaý.
«Shara aıasynda týrıstik aımaqtarymyzdy pash etetin fotokórme uıymdastyrylady. Forýmǵa QHR Týrızm boıynsha vıtse-mınıstri, QR mádenıet jáne sport vıtse-mınıstri, Týrızm ındýstrııasy komıtetiniń tóraıymy, «Kazakh tourism» ulttyq kompanııasynyń tóraǵasy, «Atameken» UKP ókilderi, sonyment qatar, alys jáne jaqyn shet memleketterdiń týrızm salasynyń kásibı mamandary, týrıstik uıymdar, ınvestıtsııalyq kompanııa ókilderi, jalpy 300-ge jýyq adam qatysatyn bolady», - dedi Batyrhan Qurmanseıit.
Aıta ketetini, forýmǵa Qytaıdyń týrıstik uıymdary asa qyzyǵýshylyq tanytyp otyr. Jalpy Ońtústik Qazaqstan oblysyna bıylǵy jyldyń 6 aıdyń qorytyndysy boıynsha 128 myń týrıst kelgen. Bul kórsetkish byltyrǵy jylmen salystyrǵanda 55 paıyzǵa artyp otyr.
Basqosý nátıjesinde sheteldik kompanııalarmen birqatar memorandýmdarǵa qol qoıylatyn bolady. Jalpy forým óńirdiń týrıstik jáne ınvestıtsııalyq ımıdjin qalyptastyrýǵa oń áserin tıgizbek.
